Көкшетаудағы жоғары оқу орындарында шетелдік студенттер көбейді

Олардың дені Үндістан,Пәкістан мен Ауғаныстаннан келген. Әсірсе медицина, IT, инженерия салалары бойынша білім алып жатқандар көп. Бір ерекшелігі, олар қазақ тілін меңгеріп, ұлы Абайдың туындаларын тамсана оқиды екен. Шоқан Уәлиханов университетінде қазір 400-ге жуық шетелдік студент оқиды. Соның 312-і медицина кафедрасында білім алады. Олардың ішінде Үндістандық Яш Хот та бар. Қазір ол қазақ тілі мен мәдениетін терең меңгеруге тырысып жүр. 

Яш Хот, студент:

- Мен қазақ тілін үйреніп жүрмін. Маған қазақ халқының мәдениеті мен дәстүрі ұнайды. Қазақ достарым бар. Оның аты - Сұлтанбек. Ол жұмыс істейді. Маған қазақ тілі ұнайды. 

Болашақ дәрігердің сөзінше, қазақстандық білім жүйесінің мәртебесі жоғары. Бұдан бөлек, шетелдік студенттердің бейімделуіне жан-жақты қолдау бар.

Яш Хот, студент:

- Елімізде медцина мамандары тапшы. Сол себепті дәрігер болуға бел байладым. Қазақстандағы осы университетті жан-жақты зерттеп, осында оқуға түстім. Бізге бұл жерде жақсы білім беріп жатыр. 

Студенттердің қазақ тіліне деген қызығушылығы жоғары. 

Аягөз Исина, мұғалім:

- Олар бір аптаның ішінде 100-120 сөздей жаттайды. Сонда үш аптада 400-дей сөзді жаттап алады. Үш аптада өздері туралы қазақша толыққанды 12 сөйлем айта алады. 

Көкшетауға шетелдік студенттердің алғашқы легі 2018 жылы келген. Былтыр сол түлектер оқуын тәмәмдап, кәсіби маман атанды. 

Ардақ Қапышев, Ш.Уәлиханов атындағы көкшетау университетінің проректоры:

- Басым көпшілігі оқуын бітіріп, Үндістанға, Пәкістанға кетті. Алайда олардың арасында Қазақстанда қалған кейбір студенттер бар. Былтыр бір студент медицинаны бітіріп, қазіргі уақытта интернатурада оқып жатыр. Оның осында ата-анасын көшіріп алып, қалу ойы бар. Ол енді онкология бөлімінде жұмыс істейді. 

Сырттан келген студенттер университет ішіндегі қоғамдық жұмыстарға белсенді. Жергілікті климатқа да бейімделіп алған. Айта кету керек, болашақ маман иелері осы алатын дипломдармен өз елдерінен бөлек Канада мен АҚШ-тада жұмыс істей алады. 

Авторлары: Абзал Азаматұлы, Евгений Шинкаренко