Жапонияда шетелдік сәби көбейді

Демографияны бекер сөз етіп отырған жоқпыз. Әлемнің бірқатар елі бала санын арттыра алмай әлек. Жыл сайын 140 млн сәби өмірге келеді. Әр секунд сайын төрт ана босанады.Алайда өкініштісі, 2 миллионнан астам шақалақ үш айға жетпей шетінеп кетеді. 

Ал кей ел бала сүюден қалып барады. Сол себепті демографияның әлсіреуі экономикаға ауыр соққы болды. 

Қазіргі таңда бала туу көрсеткіші ең төмен Жапонияда демографияны түзеуге арналған шаралар нәтижесіз. Енді мемлекет шетелден маман тартпақ. Ал өзге елдер қайтпек? 

Жапонияда жапондар емес, осында дүниеге келген шетелдік сәбилер көбейді. Былтыр бұл елде 22 мың 878 нәресте дүниеге келді. Биыл көрсеткіш былтырғымен салыстырғанда 300 балаға көп. Яғни 10 жыл бұрынғы жағдайдан 50 пайызға артқан. Шетелдік аналардың басым бөлігі Қытай, Филиппин, Бразилиядан барғандар. Сөйтіп қазір Жапонияда тұрып жатқан шетелдіктер саны 3,6 миллионға жетті. Бұл елдегі халық санының үш пайызы. Көбісінің жасы 20-30 аралығында. Ал таза жапон отбасында туған бала саны 686 мың 173-ке кеміген. Жалпы бұл елде халық саны 2008 жылы 128 миллион еді. Содан бері көрсеткіш кейінгі 16 жылда кеміп, қазірде 125 миллионға түсті. Ал 45 жылдан кейін тағы 87 миллионға дейін азаюы мүмкін. Былтыр бала туу көрсеткіші 1,15-ке тең болды. Бұл ең төменгі көрсеткіш. 

Еңбек нарығындағы бос жұмыс орындарын толтыру үшін шетелден мамандар көптеп тартылып жатыр. Сәйкесінше, Жапонияда дүниеге келген бала саны да артып келеді. Бұл елдегі көші-қон саясатына өзгерістер әкелуі мүмкін. Өйткені оңшыл саясаткерлер шетелдіктерге қатысты ережелерді қатаңдатуды және олардың жапон қоғамына бейімделуін талап етеді.

Португалияда бала туу көрсеткіші өсті

Ал Еуропаның Кәрі құрлық деген атаудан арылатын түрі бар. Португалияда бала туу көрсеткіші қарқынды болмағанмен, біртіндеп артып келеді. Биыл қыркүйекке дейін 65 410 неонаталдық скрининг бойынша арнайы талдау жүргізілген, бұл өткен жылдың осы кезеңімен салыстырғанда 2 мыңға көп. 

Неонаталдық скрининг кезінде жаңа туған нәрестенің өкшесінен қан үлгісі алынады. Португалия халықтың қартаю деңгейі ең жоғары Еуропалық Одақ елдерінің қатарына кіреді. Бала туу бойынша былтырғы көрсеткіш көңіл көншітпейді. Сонымен қатар ЕО елдерінің ішінде орташа жастағы адам саны көп мемлекеттердің бірі.  

Румынияда баласыз отбасы салық төлейді

Халық санын көбейту мақсатында кейбір ел бала сүюді жоспарлаған жұптар үшін жәрдемақы төлеу саясатын қабылдаған. Мәселен, Румыния балалы болуды жоспарлап жүрген отбасыларды қолдайтын елдердің бірі. Мұнда баласы бар жұптар салықтан босатылады. Ал керісінше, баласы жоқтар табысының 20%-ынан қосымша салық төлейді. Беларусьте демографияны көтерудің стратегиялық тәсілі - бала туғаннан кейін үш жыл бойы ата-анасына қаржылай көмек көрсетіледі. Ал Финляндияда 2013 жылы бала тууға арналған өтемақы бағдарламасы енгізілді. Яғни сәби өмірге келген сәтте мемлекет ата-анасына сыйақы береді. 

Жәрдемақы, балаларға берілетін көмектер тіпті қазір президенттің пәрменінмен әр бала үшін арнаулы шот ашылып, баланың болашағы үшін жинақ барын білеміз. Сондықтан қастерлі отанымыз аман болсын! Ұлттық мейрамымыз құтты болсын!