Конституциялық құрылымды күшпен өзгертпек болған: ҰҚК Атырауда экстремистерді ұстады

Атырауда экстремистік топ құрды және терроризмді насихаттады деген күдікпен 10 адам ұсталды. Тергеу нұсқасы бойынша, олар Қазақстанның батыс өңіріндегі конституциялық құрылымды күштеп өзгертпек болған. Сондай-ақ күштік құрылымдар балалар мен жасөспірімдерге арналған үш астыртын оқу орталығының қызметін тоқтатты, деп хабарлайды Tengrinews.kz Ұлттық қауіпсіздік комитетінің баспасөз қызметіне сілтеме жасап.

2026 жылғы 30 қазанда Атырауда ҰҚК прокуратура органдарының үйлестіруімен сотқа дейінгі тергеу аясында бір мезгілде 10 адамды ұстады.

Бұл тұлғалар экстремистік топ құру, оған жетекшілік ету және қызметіне қатысу, сондай-ақ терроризмді насихаттау және діни араздықты қоздыру баптары бойынша күдікке ілінді.

ҰҚК баспасөз қызметінің фотосы

Тергеу мәліметінше, қылмыстық топ мүшелері Қазақстанның батыс өңіріндегі конституциялық құрылыс негіздерін күштеп өзгертуді мақсат тұтқан.

ҰҚК баспасөз қызметінің фотосы

Фигуранттардың тұрғылықты жерлерін тінту барысында атыс қаруы, есірткі, діни атрибутикалар, әдебиеттер және басқа да заттай дәлелдемелер тәркіленді.

ҰҚК баспасөз қызметінің фотосы

Олар құрған балалар мен жасөспірімдерге арналған 3 астыртын оқу орталығының қызметіне тосқауыл қойылды.

ҰҚК баспасөз қызметінің фотосы

Топ мүшелерінің бірқатары бұған дейін террористік және жалпы қылмыстық құқық бұзушылықтар жасағаны үшін сотталған.

Қылмыстық-процестік кодекстің 201-бабына сәйкес өзге ақпарат жария етуге жатпайды.

28 қазанда ҰҚК Павлодар облысында сепаратистік сипаттағы видео үшін бір әйелдің ұсталғанын хабарлады. Әлеуметтік желілерде әйел адамның қазақ халқына тіл тигізіп, Қазақстанның аумақтық тұтастығына қатысты пікір білдірген видеосы тараған болатын. Күдікті бұған дейін есірткі заттарын сатқаны үшін сотты болған.

Бізді Google-дың негізгі дереккөздер тізіміне қосыңыз