Дәрігерлер көз түсін өзгертпек болған алматылық әйелдің көру қабілетін сақтап қалды

Алматы тұрғыны шетелде көз түсін өзгертуге арналған ота жасатқаннан кейін жанарынан айырылып қала жаздады. Процедура ауыр асқынуларға әкеліп соққан. Пациенттің бір көзі мүлдем көрмей қалса, екіншісі тек жарықты ғана ажыратқан, - деп хабарлайды TengriHealth тілшісі Денсаулық сақтау министрлігі мәліметіне сілтеме жасап.

Алматы тұрғыны шетелде көз түсін өзгертуге арналған ота жасатқаннан кейін жанарынан айырылып қала жаздады. Процедура ауыр асқынуларға әкеліп соққан. Пациенттің бір көзі мүлдем көрмей қалса, екіншісі тек жарықты ғана ажыратқан, - деп хабарлайды TengriHealth тілшісі Денсаулық сақтау министрлігі мәліметіне сілтеме жасап.

Алматылық көз түсін өзгерту үшін шетелдік емханаға жүгінген. Алайда отадан кейінгі асқынулар салдарынан ол көру қабілетінен толықтай дерлік айырылды. Оған глаукома және мөлдір қабықтың бұлдырауы диагнозы қойылды. Осының салдарынан емделушіге бірінші топтағы мүгедектік берілген.

Анықтама: Глаукома - бұл көру жүйкесі зақымдалатын көздің созылмалы ауруы. Емделмеген жағдайда ол көру қабілетінің қайтымсыз жоғалуына, тіпті соқырлыққа әкелуі мүмкін.

Оның айтуынша, көптеген дәрігер бұл жағдайға араласуға қорыққан. Күрделі жағдайды Алматы қалалық орталық клиникалық ауруханасының офтальмолог дәрігері Гүлзат Әбдірайымова өз мойнына алды.

"Оның күрделі операцияларды жасайтынын естіген соң, дәл осы дәрігерге жүгінуді жөн көрдім".

Дәрігерлердің айтуынша, жағдайды көз ішіндегі қысымның өте жоғары болуы қиындатқан. Ота кезінде көру қабілетін біржола жоғалтуға әкеп соғатын экспульсивті қан кету түріндегі ауыр асқыну қаупі болды.

Жоғары қауіпке қарамастан, мамандар жарықты сезу қабілеті сақталған көз үшін күресуге шешім қабылдады.

Науқасқа кешенді ота жасалды. Екі сағатқа жуық уақытқа созылған күрделі аралас операция барысында көзішілік қысымды төмендетуге бағытталған антиглаукомалық операция және мөлдір қабықты трансплантаттау жүргізілді.

Нәтижесінде дәрігерлер көз ішіндегі қысымды төмендетіп, отаға дейін тек жарықты ғана ажырата алған көздің көру функцияларын қалпына келтірді.

Хирургиялық араласудан кейін науқастың көзі көре бастады. Бүгінде әйел бақылаудан өтіп, оңалту шараларын жалғастырып жатыр.

Дәрігерлердің айтуынша, мөлдір қабықты трансплантаттау – офтальмологиядағы ең күрделі операциялардың бірі. Алматы қалалық орталық клиникалық ауруханасында мұндай жоғары технологиялық операциялар донорлық бағдарлама шеңберінде жүргізіледі. Жыл басынан бері мамандар 12 мөлдір қабықты трансплантаттау жасап, көптеген пациентке көру қабілетін сақтап қалуға және қайта қалпына келтіруге мүмкіндік берді.

ЧИТАЙТЕ ТАКЖЕ

Жаңа босанып жатқан қазақстандық әйелден алты ісік алынды

Үйде ойнап отырып, кенеттен тұншыға бастаған: Алматыда дәрігерлер 10 айлық қызды аман алып қалды

Google News арқылы жаңалықтарымызды қадағалаңыз

дәрігер

Денсаулық

операция