“Көзімізге сенбедік“ Атыраудағы ересектердің қалай көңіл көтеретініне қазақстандықтар таңғалды

Бүгін олар - футболшы, келесі жолы - сүйікті кітап кейіпкері, ал енді бірде нағыз үйлену тойын ұйымдастыруы мүмкін. Атыраулық достар он жылдан астам уақыт бойы қарапайым басқосуларды тақырыптық мерекеге айналдырып келеді, деп хабарлайды Tengri Life.

Шай ішуден тақырыптық шоуларға дейін

Қатысушылардың бірінің қызы Фаризат Алешова әлеуметтік желіде алғашында достардың жай ғана дастарқан басында жиналып, әңгіме-дүкен құрып, уақытты бірге өткізгенін айтады. Бірте-бірте олар жаңашылдықты қалаған.

Осылайша, әр басқосудың өз тақырыбы пайда болды.

Қазір бұл ортада 11 отбасы бар. Мұнда тек әйелдер ғана емес, ер адамдар да атсалысады: олар да образ ойлап тауып, киінеді, конкурстарға қатысады және кештерді ұйымдастыруға көмектеседі.

"Анам құрбыларымен 10 жылдан астам уақыт бойы жиналады, олардың тобы "Тайқазан" деп аталады. Ойыншылар саны өзгеріп тұрады, араларына қосылғысы келетіндер де көп болды. Қазір олар 11 отбасы болып ойнайды, ерлер де қосылды", - дейді Фаризат.

Қыз олардың басқосуларын таңданыспен бақылайтынын және ата-анасының қиялына әрдайым қайран қалатынын мойындайды.

Фотоны Фаризат ұсынды

Басында Наурыз, Отан қорғаушылар күні сияқты белгілі мерекелер тақырып болатын. Алайда бірте-бірте қатысушылардың қиялы кеңіп, қазіргі кезекті басқосулар кішігірім тақырыптық шоуға көбірек ұқсайды.

"Кездесу тақырыбын қонақ шақыру кезегі келген жұп анықтайды. Бір кездесудің соңында отбасы келесі жұпқа эстафета ретінде қандай да бір кәдесый сыйлайды және сол кезде келесі тақырып жарияланады. Шын мәнінде, бұл әрдайым ерекше әрі қызықты дүние болады", - деді Фаризат.

Костюмдерді бір-екі апта дайындайды

Қазіргі таңда басқосуға дайындық екі аптаға дейін созылуы мүмкін. Егер бұрын қатысушылар образдарды негізінен үйде бар заттардан құраса, қазір маркетплейстер, декорациялар мен ең күтпеген аксессуарлар қолданылады.

Бұл ретте ешкімнің қайталанғысы келмейді. Сондықтан ай сайын жаңа бірдеңе ойлап табуға тура келеді.

Кештерде би билеп, жарыстар мен түрлі ойындар ұйымдастырады. Тіпті арқан тартыс пен басқа да командалық конкурстар өткізіледі. Қатысушылар қайталанбауға тырысып, әр жолы жаңа идеялар табады. Бұл топтың қиялында шек жоқ екені байқалады.

Ата-аналардың ерекше ермегі туралы жазба тез тарап кетті - әлеуметтік желілерде ол 30 мыңнан астам қаралым мен ондаған таңданысқа толы пікір жинады. Желі қолданушылары мұндай белсенділік пен жылдар бойғы достыққа адалдық шынайы құрмет пен сүйіспеншілік тудыратынын жазды.

"Нағыз достық деген осы! Егде жаста мен де осындай ортаны армандаймын", "Ер азаматтарға ерекше құрмет! Әдетте оларды бірге суретке түсуге көндірудің өзі қиын, ал мына жерде нағыз түрленулер", "Басында көзімізге сенбедік, сөйтсек расымен де уақытты сондай көңілді өткізеді екен", "Тфай-тфай, көз тимесін! Бұл дәстүр әлі талай жыл жасасын, олар керемет күшті!" - деп жазып жатыр пікір қалдырушылар.

Футбол, сүйікті кітаптар және үйлену тойы

Басқосу тақырыптары әртүрлі. Мәселен, шілде айында достар футбол кешін ұйымдастырды - чемпионат қызып тұрған кезде киімдері мен атмосферасы спорттық тақырыпқа сай болды.

Ал 14 ақпанда бойжеткеннің ата-анасы кітап кешін ұйымдастырды. Әр қатысушы сүйікті романының кейіпкерін таңдап, соған сай образбен келуі және кітап ала келуі тиіс болды.

Бірақ, тамыз айындағы кездесу ең ерекшесі болған шығар.

Бұл топтағы бірнеше жұптың үйлену тойы дәл осы айда болған екен. Ал Фаризаттың ата-анасы биыл отасқандарына 36 жыл толғанын атап өтті. Сондықтан достары оларға қайтадан үйлену тойын жасап беруді ұйғарған - тек бұл жолы барлығына ортақ.

Фотоны кейіпкер ұсынды

Мерекеге нағыз АХАТ (РАГС) қызметкерін шақырды. Екі жұп үшін рәсім өткізіліп, содан кейін нағыз той басталды.

"Бұл ортадағы көптеген жұптың тойы тамызда болған екен және көбі өз мерейтойларын атап өтті. Мәселен, менің ата-анама биыл 36 жыл болды. Тіркеуші нағыз маман, бәрін ережеге сай өткізді, соңында оларға неке қию туралы сертификат берілді. Екі жұпқа тіркеу рәсімін жасады, қалыңдық гүл лақтырды, үкі таратылды, торт кесілді", - деп атап өтті Фаризат.

Фотоны Фаризат ұсынды

Ең бастысы - көңілді болса болғаны

Кездесулердің сыртқы ерекшелігіне қарамастан, Фаризат тақырыптық костюмдер мен шоулар тек сылтау ғана екенін атап өтті. Қатысушылар үшін ең құндысы - үнемі бас қосып, күнделікті күйбең тірліктен серпілу және жарқын сәттерді бірге бөлісу.

"Әрине, олар басқа күндері де кездеседі, бірақ кезекті ойынды ерекше асыға күтеді. Меніңше, бұл дәстүр олардың ауызбіршілігінің, адалдығы мен достыққа жеңіл қарауының, сондай-ақ жанқиярлығының арқасында сақталып қалды", - деді ол.

Фаризаттың өзі жолдасымен бірге осындай кездесулерге қатысатынын мойындады. Рас, ата-аналарының "Тайқазан" деңгейіне жетуге әлі біраз бар.

Ал "Тайқазан" тобындағы достардың қарапайым құпиясы бар сияқты: олар әлі күнге дейін бір-бірімен уақыт өткізуге қызығады және әр кез жаңа дүние ойлап табады.

Google News арқылы жаңалықтарымызды қадағалаңыз

Жазылу