Лондон Наурызды тойлап жатыр: мәдениет, музыка және халық қолөнері фестивалі

Наурыз мерекесі Лондондағы Университеттік колледж аумағында «Орталық Азия көктемі» фестивалі аясында өтті. Іс-шараға диаспора өкілдері, студенттер, тұрғындар және Ұлыбритания астанасының қонақтары жиналды. 

Фестивальді Наурыз мерекесі дәстүрлі түрде тойланатын елдердің студенттік қауымдастықтары ұйымдастырды. Алғашқы сағаттардан бастап мұнда музыка, әңгіме және ұлттық тағамдардың хош иісі аңқыған жарқын мерекелік атмосфера орнады.

— Наурыз бізді мәдениет, музыка және дастарханның жомарттығы арқылы біріктіріп, әр ұлтқа өз жанының бір бөлігін бөлісуге мүмкіндік беріп отыр, — деп атап өтті фестивальдің негізгі ұйымдастырушысы Лондондағы Университеттік колледжі Қазақ студенттері қоғамының жетекшісі Едіге Ерқасынов.

Ұлттық тағамдар мен қолөнер бұйымдарының бай көрмесі өткен Орталық Азия жәрмеңкесі бұл күннің ерекше оқиғасына айналды. Қонақтар палау, манты, бауырсақ және қуырдақ сияқты дәстүрлі тағамдарды көріп қана қоймай, оның дәмін де тата алды.

Фестиваль аясында сонымен қатар шеберлік және презентациялық стендтер ұсынылып, онда келушілер ұлттық нақыштағы зергерлік бұйымдар, жарқын дәстүрлі костюмдер, киізден және былғарыдан жасалған бұйымдар, сәукеле (дәстүрлі қазақ халық киімі), тақиялар және қолдан жасалған түрлі кәдесыйларды тамашалай алды. 

— Бұл фестиваль Наурызды тойлауды ғана емес, сонымен қатар мәдени байланыстарды нығайтуға, халықаралық аудиторияны аймақтың дәстүрлерімен таныстыруға және мәдениеттер арасындағы диалог үшін кеңістік жасауға бағытталған, — деп атап өтті London Kazakh Centre қоғамдық бастамасының директоры Қуат Серіков.

London Kazakh Centre — Ұлыбританияда тұратын қазақстандықтарды біріктіруге бағытталған қоғамдық бастама. Оның негізін қалаушылар студенттер, жас мамандар және отбасыларды біріктіретін ашық қоғамдастық құруға ұмтылып отыр.

Келушілер Орталық Азия халықтарының әдет-ғұрыптарымен жақынырақ таныса алатын интерактивті аймақ орталық кеңістіктердің бірі болды. Мұнда келушілер 3D-басып шығару арқылы арнайы жасалған ойын бөліктерін пайдаланып, дәстүрлі асық ату ойынына қатысуға болады. 

Бас сахнада концерттік бағдарлама өтті. Көрермендер алдында домбыра, қобыз және әзербайжан сазы сияқты дәстүрлі аспаптарда ойнайтын музыканттар, ұлттық билерді орындаған би топтары өнер көрсетті, ал спикерлер аймақтың мәдениеті мен тарихы туралы баяндады.
Моңғолиядағы қазақтар Наурыз мейрамын қалай тойлайтынын мына материалдан оқи аласыз.