LRT желісіндегі іркілістерге жолаушылардың қауіпсіздік ережесін бұзуы себеп болған

АСТАНА, 17 мамыр – Sputnik. Астанадағы LRT желісіндегі іркілістерге жолаушылардың қауіпсіздік ережесін бұзуы себеп болған. Бұл туралы CTS компаниясы хабарлады.

Компанияның мәліметінше LRT желісінде кейбір жолаушылар қауіпсіздік ережесін сақтамаған.

Атап айтқанда жолаушылар:

шұғыл тежеу батырмасын негізсіз басқан,

платформалық есіктерді шұғыл ашу батырмасын іске қосқан,

вагон есіктерін ішінен өз бетінше ашуға әрекет жасаған;

есік жақтауларының арасына қолын салып, есіктердің жабылуына қасақана кедергі келтірген.

"LRT жүйесі толық автоматтандырылған, сондықтан мұндай әрекеттер қауіпсіздікке ықтимал қатер ретінде қабылданады. Бұл пойыздың тоқтауына және тексеріс жүргізуге себеп болады", - деп түсіндірді мамандар.

CTS компаниясы жолаушыларды LRT пайдалану ережесін сақтауға шақырды.

"Әрбір құрамның ішінде LRT пойызының операторы бар, ол қажет болған жағдайда электр қуаты ажыратылғаннан кейін ғана есіктерді ашады", - деп жазылған хабарламада.

Барлық құқық бұзушы стансалар мен вагондардың ішінде орнатылған бейнебақылау камералары арқылы анықталады. Материалдар полицейлерге беріледі.