“Лувр эффектісі“: Еуропада өнер туындыларының сақталуына қатысты алаңдаушылық артуда

Италияның Парма қаласы маңындағы Магнани Рокка қорының мұражайынан басына шам таққан екі қаскөй үш минуттың ішінде Сезанн, Ренуар және Матисстің құны шамамен 9 миллион еуроға бағаланған туындыларын үптеп кетті. Оқиға наурызда болған. Бұл Луврдағы былтырғы тонаудан кейін Франция, Италия және Испанияда болған ұрлықтар сериясының бір бөлігіне айналды, деп хабарлайды Tengri Life Reuters агенттігіне сілтеме жасап.

Еуропаның шағын жеке қорлары ресурстардың шектеулі болуына байланысты экспонаттардың қауіпсіздігін ірі мұражайлар деңгейінде қамтамасыз ете алмайды.

"Дәл осы жерде біз "Лувр әсерін" көріп отырмыз. Егер Луврда ұрлық жасау оңай болса, ауылдық жердегі немесе шағын қалашықтағы кішкентай мұражайдың жағдайын елестете беріңіз", - дейді барселоналық зерттеуші Марк Бальсельс.

Франция Мәдениет министрлігінің сауалнамасына (2024) сәйкес, мекемелердің тек төрттен бірінде төтенше жағдайға арналған жоспар бар, ал жартысына жуығында бейнебақылау орнатылмаған. Парламенттік баяндамада ресурстар мен дайындықтың тапшылығы айтылады. Италияда шағын мұражайлар желісінің кеңдігі қауіп-қатерді арттырып отыр.

"Біздің жүйеміздің ерекшелігі де осында: өнер туындылары өздері жасалған жерлерде қалады. Бірақ біз қылмыскерлердің жұмысын қиындатуымыз керек", - деді ИКОМ-ның Италия комитетінің президенті Антонелла Пинна.

Италияда 2025 жылы мұражайлар мен қорларда 17 ұрлық тіркелді (бір жыл бұрын - 14). Европол ұрлық ауқымының кеңейгенін және бағалы металдар мен жәдігерлерге деген қызығушылықтың артқанын атап өтті.

"40 жылдық еңбек жолымда алғаш рет өнер туындыларын ұрлаудың әлдеқайда күрделі әрі қауіпті сипат алғанын көріп отырмын. Бұрын бұл әрдайым елеусіз қауіп саналатын", - деді Howden Specialty өкілі Филиппо Геррини-Маральди.

Мұражай иелеріне жәдігерлердің қауіпсіздігі мен келушілерге қолжетімділігі арасындағы тепе-теңдікті іздеуге тура келеді.

"Түптеп келгенде, мұражайлар қолжетімді болып қалуы тиіс. Адамдар 50 қауіпсіздік тексерісінен өтпей-ақ, ішке еркін кіре алуы керек", - дейді қор иелері.

Пармадағы жеке қордан ұрланған Сезанн, Матисс және Ренуардың суреттері тамыз айында табылды. Тергеу мәліметтері бойынша, күдіктілер Шығыс Еуропа мен Ресейден сатып алушыларды нәтижесіз іздеген. Туындылар мұражайға қайтарылды.

Бізді Google-дың негізгі дереккөздер тізіміне қосыңыз