Малшы, сауыншы, механизатор, ветеринар, агрономдардың жалақысына қосымша төлем қарастыру қажет Темір Қырықбаев

Мәжіліс депутаты,  «AMANAT» партиясы фракциясының мүшесі Темір Қырықбаев ауылдағы агросектор саласында кадр саласының жетіспеушілігін қозғап, оларға Үкімет тарапынан жалақысына қосымша төлем ұйымдастыру керегін көтерді. Ол ҚР Премьер-министрінің орынбасары Серік Мақашұлы Жұманғаринге депутаттық сауал жолдады, – деп хабарлайды Aikyn.kz.

– Мемлекет басшысы Қасым-Жомарт Тоқаевтың былтырғы Жолдауында: «Елдегі азық-түлік нарығының импортқа тәуелділігін барынша азайту – Үкіметтің стратегиялық міндеті деп атап өткен болатын. Азық-түлік қауіпсіздігін қамтамасыз ету – Қазақстанның стратегиялық міндеті, ол отандық ауыл шаруашылығын дамыту, өнімді жеткізу логистикасын оңтайландыру және импортқа тәуелділікті азайту арқылы шешіледі. Тұрақты өндіріс пен сапалы өнім – халықтың әл-ауқатын арттырудың басты кепілі. Қазіргі жаһандық азық-түлік дағдарысы мен халық санының өсуі жағдайында өзін-өзі қамтамасыз ету тәуелсіздік пен тұрақтылықтың маңызды факторына айналуда. Бұл бағыттағы жұмыс – еліміздің әлеуметтік-экономикалық дамуының негізі. 

Парламент Мәжілісінің депутаты ретінде жыл басында өңірлерге барып, сайлаушылармен кездесіп, ауыл-аймақтардағы өзекті мәселелермен таныстым. Ауылдағы агросектор саласында ең өзекті әрі күрделі мәселенің бірі – кадр тапшылығы. Әсіресе, малшы, сауыншы, механизатор, ветеринар, агроном, зоотехник секілді мамандардың жетіспеушілігі  бар екенін жеткізді. Бұл жағдай ауылдық жерлердегі тұрмыс деңгейінің төмендігімен, еңбекақы мөлшерінің жеткіліксіздігімен және әлеуметтік қолдау тетігінің әлсіздігімен тікелей байланысты, – дейді Темір Қырықбаев.

Депутат аталған мәселелердің Жоғары аудиторлық палата есебінде де айқын көрініс тапқанын қозғады.

– Атап айтқанда, зейнетақы жарналары аударылмаған азаматтардың санының айтарлықтай көп.  Бұл еңбек заңнамасының сақталу деңгейінде елеулі олқылықтың барын көрсетеді. Мұндай үрдіс жұмыс берушілер тарапынан міндеттемелердің толық орындалмауы немесе бақылау тетіктерінің әлсіздігімен байланысты болуы мүмкін. Кадр тапшылығының орын алуы агроөнеркәсіптік кешеннің тұрақты дамуына, еңбек өнімділігінің артуына және елдің азық-түлік қауіпсіздігіне тікелей қауіп төндіреді.

Осыған байланысты, ауыл шаруашылығы саласына мамандарды тарту және оларды тұрақтандыру мақсатында кешенді әрі жүйелі өзгерістер енгізу қажет. Қазақстан негізгі азық-түлік өнімдері бойынша толық өзін-өзі қамтамасыз етуге көшуді 2028 жылға дейін жоспарлап отыр. Алайда ауылдағы шаруалардың тарапынан  көтерген кадрлық мәселесін толыққанды шешілмей, елімізді азық-түлік өнімдерімен өзін-өзі толық қамтамасыз етуге мүмкін емес.  

Сондықтан ауыл шаруашылығы қызметкерлерінің еңбекақысын арттыру мақсатында Үкімет тарапынан қосымша төлемдер қарастырып, жергілікті бюджет есебінен арнайы субсидиялау бағдарламасын енгізу қажет. Екіншіден, ауыл шаруашылығы саласында еңбек ететін азаматтар үшін жеке табыс салығының төмендетілген мөлшерлемесін белгілеу керек. Үшіншіден, аграрлық колледждер мен жоғары оқу орындарында мақсатты гранттар санын ұлғайтып, шәкіртақы көлемін арттыру керек, – дейді депутат. 

Депутат – «AMANAT» партиясы фракциясының мүшесі                                  Т. Қырықбаев