Маңғыстау облысындағы Темір баба бекеті жаңартылды

Маңғыстау облысындағы «Темір-баба» кеден бекеті жаңартылды, деп хабарлайды 24KZ. Енді қазақ-түрікмен шекарасынан 30 минут ішінде еш кедергісіз өтуге болады.

Стратегиялық нысан аумағы бұрын 3 мың шаршы метр болған. Жаңғыртудан кейін екі есеге ұлғайды. Бұдан былай жүргізушілер мен жолаушы құжаты көліктен шықпай-ақ сканерленеді. Рәсімдеу шаралары «Кеден» біртұтас цифрлық жүйесі арқылы «Бір терезе» қағидасымен жасалады. Алты жолақты кеден бекетінің өткізу қабілеті 150-ден 350 көлікке дейін өсті. Электрондық кезек кептелісті болдырмайды.

Қазір елде 55 автокөлік өткізу бекеті бар. Бес жылда 37-сін жаңғырту жоспарда тұр.

Артем Абильдинов, облыстық Мемлекеттік кірістер департаменті басшысының орынбасары:

- Бекет заманауи бақылау құралдарымен жабдықталған. Радиациялық детекторлар, жылу камералары, салмақ пен көлем өлшегіштер, инспекциялық бақылау кешендері және багажды бақылау үшін рентген аппараты адамдарды тексереді. Орташа өту уақыты келген тұлғалар үшін 5 минуттан аспайды.