Мәскеуде атақты физикті мемлекетке опасыздық жасады деп 21 жылға соттады

ФҚҚ (ФСБ) оны Украина Қарулы Күштеріне ақша аударды және арнайы қызметтердің нұсқауымен DDoS-шабуылдарды ұйымдастырды деп есептейді, деп хабарлайды Arasha.kz.

"Осторожно, новости" басылымының хабарлауынша, Ресей Ғылым академиясының Прохоров атындағы Жалпы физика институтының бұрынғы ғылыми қызметкері Артем Хорошилов мемлекетке опасыздық жасағаны (Қылмыстық кодекстің 275-бабы) және аса маңызды инфрақұрылымдарға шабуыл жасағаны (РФ ҚК 274.1-бабы) үшін кінәлі деп танылды.

Оған сондай-ақ 700 мың рубль айыппұл салынды, жеке компьютері, Wi-Fi роутері және ұялы телефоны, сондай-ақ оның Украинаға аударған 780 мың рублі тәркіленді. Қорытынды айыптауда оған диверсия жасауға дайындалу (ҚК 281-бабы) және жарылғыш заттарды сақтау (ҚК 223.1-бабы) да тағылды. Прокуратура оған 25 жыл колония сұраған болатын.

2024 жылдың ақпанында ФҚҚ ғалымның Украина арнайы қызметтерінің нұсқауымен аса маңызды объектілерге шабуыл жасағанын (соңында оған "Почта России" серверлеріне шабуыл ұйымдастырды деген айып тағылды), әскерилер туралы мәліметтер жинағанын және Украина Қарулы Күштерімен байланысты қорға шамамен 700 мың рубль аударғанын мәлімдеді. Ер адам 2023 жылдың желтоқсанында қамауға алынған.

Сотта прокуратура өкілі Хорошиловтың жақсы білімі мен оң мінездемесі ер адамның кінәсін одан әрі ауырлатады деп мәлімдеді, өйткені ол "жоғары зияткерлік әлеуетке ие бола тұра, өз білімі мен дағдыларын өз елінің қауіпсіздігін сатуға саналы түрде және мақсатты түрде бағыттаған" және білместіктен емес, мемлекетке қарсы көзқарастарынан әрекет еткен. Ұсталғаннан кейін физик жұмыс істеген институт оның парақшасын ресми сайтынан жойып тастады.