Массачусетс технологиялық институтымен бірлесіп Day of AI Qazaqstan бағдарламасы енгізіледі

Мемлекет басшысы Қасым-Жомарт Тоқаевтың 2026 жылды Цифрландыру және жасанды интеллект жылы деп жариялау туралы тапсырмасына сәйкес, Оқу-ағарту министрлігі Массачусетс технологиялық институтымен (Massachusetts Institute of Technology, MIT) бірлесіп  Day of AI Qazaqstan  бағдарламасын жалпы орта білім беру жүйесіне енгізуде, – деп хабарлайды Aikyn.kz.

Бағдарлама әрбір оқушыға жасанды интеллектінің жұмыс істеу қағидаттары, оның мүмкіндіктері, тәуекелдері және соған байланысты жауапкершілік туралы түсінік қалыптастыруға бағытталған. Сонымен қатар математика, физика, химия, биология, жаратылыстану және информатика сияқты негізгі пәндерді жасанды интеллект құралдарын пайдалана отырып оқытудың жаңа форматтарын қалыптастырады. Бұл оқытудың практикалық бағытын күшейтуге, визуализация мүмкіндіктерін кеңейтуге, есептерді шешу мен жобалық жұмыстардың сапасын арттыруға мүмкіндік береді. Бастама ұлттық құндылықтар мен жасанды интеллект технологияларын ұштастыру негізінде әзірленуде.

Бағдарламаны іске асыру екі кезеңде жүзеге асырылады. Бірінші кезең оқушылар мен мұғалімдер арасында жасанды интеллект сауаттылығының негіздерін қалыптастыруға бағытталған. Оқу мазмұны жасанды интеллектінің базалық ұғымдарын, оны қолдану мысалдарын және этика мәселелерін қамтиды. Педагогтерді даярлау каскадтық модель бойынша жүргізіледі. Бұл ретте Day of AI командасы мұғалім көшбасшыларды оқытады, олар кейін MIT тарапынан сертификат алып, өз білімдерін әріптестеріне тарата алады. Оқу ресурстарын қазақстандық жағдайға бейімдеу және бағдарламаны кеңінен енгізу мақсатында Ы.Алтынсарин атындағы Ұлттық білім академиясының мамандары мен тартылған сарапшылардан тұратын жергілікті команда құрылды.

Екінші кезеңде барлық сыныптарға арналған жасанды интеллект бойынша толыққанды пәнаралық оқу бағдарламасын әзірлеу және іске қосу жоспарланған. Бағдарлама пәндік бағыттармен интеграцияланады. Жұмыс қазақстандық педагогтер мен MIT RAISE (Responsible AI for Social Empowerment and Education) командасының бірлесуімен жүргізілуде. Бағдарлама пилоттық режимде апробациядан өткізіліп, кері байланыс негізінде жетілдіріледі. Әр оқу жылы үшін бір тоқсанға есептелген жасанды интеллект сауаттылығы бойынша 8-10 сабақтан тұратын оқу модульдері қарастырылған.

Сабақтар ЮНЕСКО мен Экономикалық ынтымақтастық және даму ұйымының халықаралық жасанды интеллект сауаттылығы шеңберлеріне сәйкес есептеу және цифрлық бағыттағы пәндерге енгізіледі. Курсты оқу процесіне толық енгізу 2028 жылдың тамызына дейін жоспарланған.

Сонымен қатар нормативтік және әдістемелік қамтамасыз ету кешені әзірленуде. Оның ішінде үлгілік оқу бағдарламаларын және оқу-әдістемелік кешендерді жаңарту, бағалау құралдарын әзірлеу, білім беру ұйымдарына арналған әдістемелік ұсынымдар дайындау, педагогтердің біліктілігін арттырудың тұрақты моделін қалыптастыру және білім сапасын мониторингтеу жүйесін енгізу қарастырылған.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.