Мәжілісте 2025 жылғы бюджет тапшылығы қандай болғаны айтылды

Өткен жылы республикалық бюджет тапшылығы 4,1 триллион теңгені құрады. Мұндай мәліметті Мәжіліс депутаты Татьяна Савельева мәлімдеді, деп хабарлайды Tengrinews.kz.

Өткен жылы республикалық бюджет тапшылығы 4,1 триллион теңгені құрады. Мұндай мәліметті Мәжіліс депутаты Татьяна Савельева мәлімдеді, деп хабарлайды Tengrinews.kz.

Үкімет пен Жоғары аудиторлық палата (ЖАП) депутаттарға 2025 жылғы республикалық бюджеттің атқарылуы туралы есеп береді. Мәжілісмендер тиісті заң жобасын бүгін жұмысқа қабылдады.

Татьяна Савельева ресми деректерге сілтеме жасай отырып, 2025 жылы Қазақстан экономикасы нақты мәнде 6,5 пайызға өскенін айтты.

"Көлік, құрылыс қызметтері, тау-кен өндірісі және сауда негізгі драйверлерге айналды. Республикалық бюджеттің негізгі параметрлері мынадай көлемде атқарылды: кірістер - жылдық жоспарға қарағанда 98,6 пайыз, шығындар - 99,1 пайыз. Тапшылық 4,1 триллион теңге немесе ІЖӨ-ге қатысты 2,5 пайыз деңгейінде қалыптасты. Биыл үкімет пилоттық режимде жаңа Бюджет кодексінің талаптарын ескере отырып, есепті кеңейтілген форматта ұсынды", - деді Савельева.

Сонымен қатар мемлекеттік инвестициялық жобалар, бюджеттен тыс қорлар, мемлекеттік сектордағы санаттар, шоғырландырылған бюджет және басқа да мәселелер бойынша талдау материалдары ұсынылды. Соның арқасында депутаттар корпусы бюджет пен мемлекет активтері бойынша толыққанды ақпарат алуы тиіс.

Сондай-ақ басқа да экономикалық және бюджеттік көрсеткіштер жоғарыда көрсетілген есептерді қарау аясында талданатын болады.

Үкімет пен ЖАП есебін Мәжілістің алдағы жалпы отырыстарында тыңдау жоспарланған.

Еске сала кетейік, өткен жылдың соңында Қазақстанда 2026 жылға арналған бюджет бекітілді. Жоспар бойынша биыл республика бюджетіне 22,8 триллион теңге кіріс түседі, оның 80 пайызы - салықтар. Ал келесі жылы шығыстар, тіпті жоспар бойынша да, көбірек - 27,7 триллион теңгені құрайды.