Медициналық сақтандыру қорынан 80 миллион теңге жымқырғандарға сот үкімі шықты

Астанада медициналық ұйым арқылы алаяқтық схемасын ұйымдастырып, Әлеуметтік медициналық сақтандыру қорына 80 млн теңге залал келтірген тұлғаларға қатысты сот үкімі шықты, – деп хабарлайды Aikyn.kz.

2026 жылғы 21 қаңтарда Астана қаласының қылмыстық істер жөніндегі ауданаралық соты азаматтар Н. және А.-ға қатысты қылмыстық іс бойынша айыптау үкімін жариялады.

Сот үкімімен олар:

адамдар тобының алдын ала сөз байласуы арқылы, аса ірі мөлшерде бөтеннің мүлкін алдау арқылы иемдену (ҚР ҚК-нің 190-бабы 4-бөлігі 2-тармағы); сондай-ақ қызметтік жағдайын пайдалана отырып, адамдар тобының алдын ала сөз байласуы арқылы ірі мөлшерде алаяқтық жасау (ҚР ҚК-нің 190-бабы 3-бөлігі 1-тармағы) қылмыстарын жасағаны үшін кінәлі деп танылды.

Сотта анықталғандай, Н. «ЖШС» медициналық ұйымының құрылтайшысы бола отырып, 2023 жылдың сәуір мен шілде айлары аралығында Әлеуметтік медициналық сақтандыру қорының (ӘМСҚ) қаражатын заңсыз иемдену мақсатында азаматтарды өзінің медициналық ұйымына жалған түрде тіркеу схемасын ұйымдастырған.

Қылмыстық жоспарды жүзеге асыру үшін Н. «Денсаулық сақтауды дамыту ұлттық ғылыми орталығының Астана филиалында» маман болып қызмет атқарған А.-ға заңсыз сыйақы ұсына отырып, азаматтарды тіркеу туралы жалған өтінімдерді бекітіп, мақұлдауды сұраған.

А. бұл ұсыныспен келісіп, қызметтік өкілеттігін пайдалана отырып, жалған тіркеу өтінімдерін заңсыз түрде растаған.

Нәтижесінде, аталған медициналық ұйымға 15 мыңнан астам азамат жалған түрде тіркеліп, Әлеуметтік медициналық сақтандыру қорынан бюджет қаражаты заңсыз алынған.

Маманның қорытындысына сәйкес, қорға келтірілген жалпы залал шамамен 80 миллион теңгені құрады. Оның ішінде 7,5 миллион теңге А.-ның тікелей әрекеттерінен келген материалдық шығын ретінде бағаланған. Заңсыз алынған қаражат Н. мен А. арасында бөлінген.

Сот жазаны жеңілдететін мән-жайлар ретінде сотталушылардың кінәсін мойындауын, шын жүректен өкінуін, кәмелетке толмаған балаларының болуын және бұрын сотты болмауын ескерді. Ауырлататын мән-жайлар анықталған жоқ.

Келтірілген залалдың өтелмеуін ескере отырып, сот:

Н.-ға – орташа қауіпсіздік мекемесінде 5 жыл бас бостандығынан айыру, А.-ға – 3 жыл бас бостандығынан айыру жазасын тағайындады.

Рақымшылық туралы заңға сәйкес, А.-ның жаза мерзімі 1/5-ке қысқартылып, түпкілікті түрде 2 жыл 4 ай бас бостандығынан айыру жазасы белгіленді.

Сот үкімі заңды күшіне енген жоқ.