Өскемен әуежайынан 140 млн теңгеден астам қаражат жымқырғандарға сот үкімі шықты

Әуежайдың бұрынғы президенті мен атқарушы директоры қызметтік өкілеттіктерін пайдалана отырып, бірнеше рет аса ірі көлемде сеніп тапсырылған мүлікті талан-таражға салған. 

Сондай-ақ материалдық-техникалық жабдықтау тобының басшысы сеніп тапсырылған мүлікті иемдену және ысырап ету дерегі бойынша сотқа тартылды. 

— Сот барысында анықталғандай, 2018-2023 жылдар аралығында айыпталушылар азаматтық-құқықтық сипаттағы шарттар жасау арқылы мердігер ұйымдарға төленетін шығындарды негізсіз арттырып отырған. Шартта көрсетілген сома мен нақты төлем арасындағы айырманы өз пайдаларына жаратқан. Сот кезінде олар өз кінәларын толық мойындамады, — деп хабарлады Өскемен қаласының қылмыстық істер жөніндегі ауданаралық сотынан.

Сот үкімімен әуежайдың президенті ҚР ҚК-нің 361-бабы 4-бөлігі 3-тармағы және 189-бабы 4-бөлігі 2-тармағымен кінәлі деп танылып, 8 жылға түрмеге қамалды. Одан «Өскемен әуежайы» АҚ-ның пайдасына 120 млн теңгеден астам қаражат өндірілді.

Атқарушы директор 7 жылға бас бостандығынан айырылса, материалдық-техникалық жабдықтау тобының басшысы 1 жылға шартты түрде сотталды. Екеуінен 2 млн теңгеден астам материалдық шығын өндірілді.

Бұдан бөлек, сот әуежай президенті мен атқарушы директордан тағы 19 млн теңгеге жуық қаражатты өндіру туралы шешім шығарды. Үкім әлі заңды күшіне енген жоқ.

Еске салсақ, осыған дейін Ақтөбеде авиазауыттың экс-басшысы 110 млн теңге жымқырды деген күдікке ілінгені хабарланған.