Мемлекет басшысы Архив ісі туралы заңға қол қойды

Мемлекет басшысы архив ісі туралы заңға қол қойды. Құжат архив ісі саласындағы заңнаманы жетілдіруге, мемлекеттік архивтердің мәртебесі мен қызмет тиімділігін арттыруға, сондай-ақ балалардың құқықтарын қорғауға бағытталған кешенді әрі жүйелі нормаларды айқындайды.

Ол Қазақстан Үкіметінің 2024 жылға арналған заң шығару жұмысының жоспарын орындау, Мемлекет басшысының 2024 жылғы 15 наурызда Ұлттық құрылтайда берген тапсырмаларын іске асыру мақсатында, сондай-ақ қоғам сұранысына байланысты әзірленді. Заң цифрлық архивті қалыптастыруда құқықтық негіздерді айқындайды, сондай-ақ «Қазақстан Ұлттық архив қоры және архивтер туралы» заңының қолданылу аясын кеңейтеді. Сонымен қатар, құжаттардың сақталуын қамтамасыз ету, оларды электрондық форматқа көшіру, Ұлттық архив қорының құрамын жаңа құжат түрлерімен толықтыру, сондай-ақ ұғымдық аппаратты жаңарту мәселелерін қамтиды.