Мемлекеттік қолдауды жылдар бойы бірдей компаниялар алып келген

Мәжіліс депутаты Нұртай Сабилянов Қазақстанда бизнеске көрсетілетін мемлекеттік қолдаудың тиімділігі мен бөліну ашықтығына күмән келтірді, деп хабарлайды Arasha.kz.

Парламенттің төменгі палатасының отырысында сөйлеген сөзінде Сабилянов Жоғары аудиторлық палатаның (ЖАП) тексерісі мемлекеттік қолдау шараларының нәтижелілігіне әсер ететін басқару, есепке алу және талдау жүйесіндегі шикіліктерді анықтағанын атап өтті.

Қолдау шаралары шашыраңқы көрсетіледі, ал Ұлттық экономика министрлігі мен салалық мемлекеттік органдар арасындағы жауапкершілік функциялардың қайталануы мен түйісуіне байланысты бұлыңғыр болып қалған.

— Көптеген даму институттары мен операторлар құрылған: Қазақстанның Даму Банкі, Өнеркәсіпті дамыту қоры, «Даму» кәсіпкерлікті дамыту қоры, «QazIndustry» қазақстандық индустрия және экспорт орталығы, «QazTrade» сауда саясатын дамыту орталығы және тағы басқалар. Оларда тиімділікті анықтау мен талдау жүйесі қалыптаспаған. Мемлекет басшысының мемлекеттік қолдау шараларын «бір терезе» қағидаты бойынша ұсыну туралы тапсырмасы әлі күнге дейін орындалған жоқ, — деді ол.

Депутат түрлі құралдар арқылы және әртүрлі операторлардан көп жылдар бойы қаржылық қолдау алып келген компанияларды мысалға келтірді:

«Терра» ЖШС — 10 жыл ішінде (2015–2024 жж.) 17 млрд 11 млн теңге сомасына 19 қолдау құралын алған.

«Ақтеп» ЖШС — 10 жыл ішінде (2015–2024 жж.) 11 млрд 679 млн теңге сомасына 13 құралды иеленген.

«Полтри Агро» ЖШС — компания 2019 жылы құрылғанына қарамастан, 4 жыл ішінде (2020–2023 жж.) 2 млрд 932 млн теңге сомасына 7 құралды пайдаланған.

Анықталған заң бұзушылықтарға байланысты Сабильянов бір субъектіге мемлекеттік қолдаудың бірнеше шарасы мен түрін беруді тоқтатуды, сондай-ақ уәкілетті органдар тарапынан әрбір шараның тиімділігіне бағалау мен талдау жүргізуді қамтамасыз етуді ұсынды.