Мемлекеттік ту елдіктің белгісі

Түркістанда «Рәміздер» алаңында Республика күніне арналған Мемлекеттік туды көтеру рәсімі өтті. Әнұранымыз шырқалып, көк байрағымыз көкте желбіреді. Одан кейін қала күніне орай мерекелік іс-шаралар жалғасын тапты. Ұлттық спорт ойындарынан жарыс, қолөнер шеберлерінің көрмесі, азық-түлік жәрмеңкесі ұйымдастырылды.

Салтанатты ту көтеру рәсіміне облыс әкімі Нұралхан Көшеров, өңірдің құрметті азаматтары мен қала тұрғындары қатысты. Жиында аймақ басшысы бүгінгі мереке Республиканы құрудағы тұлғалардың елеулі еңбегін дәріптейтін, азат ел екенімізді мақтан тұтанын күн деп еске алды.

Нұралхан Көшеров, облыс әкімі:

- Қазақ халқының мәдениетін, дәстүрін, тілін қайта түлету, ұлттық болмысты қалыптастыру әрі нығайту сияқты мемлекеттік қағидалар бекітіліп, көпшілікке ұсынылды. Бұл халқымыздың азат ойы мен еркін рухының жеңісі. Көк байрағымыз әрдайым желбіреп, еліміздің мәртебесі биіктей берсін.

Одан кейін Достық үйі маңында Республика және қала күніне арналған ұлттық спорт түрлерінен жарыс өтті. Онда білекті палуандар қазақша күрестен сынға түсті. Қошқар көтеру, қолкүрес, арқан тартыс жиналғандарға мерекелік көңіл күй сыйлады.

Еркеғали Қуандық, палуан:

- Бүгін мереке қарсаңында ұлттық спорт түрлерінен жарыстар болып жатыр. Өзім қазақ күресінен бағымды сынап жатырмын. 90 келі салмақта өнер көрсетіп, жеңіс тұғырынан көрінемін деген ойдамын.

Сондай-ақ жергілікті тауар өндірушілердің азық-түлік жәрмеңкесі өтті. Онда күнделікті тұрмысқа қажетті азық-түлік түрлері нарықтағыдан төмен баға да көпшілікке ұсынылды.

Ұлбосын Көлетова, қала тұрғыны:

- Жылқының етін, сары май, бал, қаймақ, қауын, көкөніс және тағы біраз нәрсе алдық. Өзімізге де сапалы дүние алғымыз келеді ғой. Көңілімізге ұнады бүгінгі жәрмеңке.

Мерекелік шара аясында қала қонақтары мен тұрғындары шеберлердің қолынан шыққан түрлі бұйымдарды тамашалады. 

Авторлары: Жандос Жұмабек, Ерболат Әбіш, Қуаныш Әбуов