Мен сіздің QR шмюарыңызды білмеймін . Сүлейменов картамен төлеу туралы пікір білдірді

Қазақстанда бірыңғай QR-код іске қосылғаннан кейін дүкендер банктік карталар арқылы төлем қабылдаудан бас тарта ала ма? Ұлттық банкте өткен брифингте осындай сауал қойылды, деп хабарлайды Tengrinews.kz тілшісі.

Ұлттық банк төрағасының орынбасары Бинұр Жәленов бірыңғай QR іске қосылғаннан кейін төлемді тек QR-код арқылы қабылдау туралы ешқандай талап қойылмайтынын түсіндірді. Оның айтуынша, заңнама сауда нүктелерін сатып алушыларға қолма-қол ақшасыз төлем жасау мүмкіндігін қамтамасыз етуге міндеттейді.

"Төлем картасы мен QR-төлем жүйесі қолма-қол ақшасыз төлем тәсілдеріне жатады. Яғни, саудагер өз клиентіне сатып алған тауары үшін қолма-қол ақшасыз тәсілмен төлеу мүмкіндігін ұсынуы тиіс", - деді Жәленов.

Ол бүгінде қолма-қол ақшасыз төлемнің ең көп таралған түрі банктік карталар болып қала беретінін, ал бірыңғай QR қосымша құрал болатынын атап өтті.

Сонымен қатар Ұлттық банк төрағасы орынбасарының айтуынша, қазір ел бойынша карталарды және QR-төлемдерді қабылдауды қамтамасыз ететін 1,5 миллионға жуық POS-терминал жұмыс істеп тұр.

Кәсіпкер карта қабылдауды өшіріп, тек QR-ды қалдыра ала ма деген сұраққа жауап бере отырып, Ұлттық банк төрағасы Тимур Сүлейменов бұдан ешқандай практикалық мән көрмейтінін мәлімдеді.

"Мәселен, сіз үй жанындағы шағын дүкенсіз дейік. Сізде картаны да, QR-ды да қабылдай алатын аппараттар тұр. Картаны өшіріп не істейсіз? Енді картамен төлеуге болмайды, тек QR арқылы ма? Жоқ, мұны ешкім жасамайды, өйткені клиенттен айырылып қалуы мүмкін.

QR-ы жоқ, бірақ картасы бар ересек клиент келіп: "QR-шмюарыңызды білмеймін, картамен төлеймін" деуі мүмкін. Кәсіпкер картамен төлеуді шектемейтіні анық", - деді Сүлейменов.

Ол бірыңғай QR арқылы төлеу кезіндегі тарифтер банктік картамен төлегеннен жоғары болмайтыны заңмен бекітілгенін еске салды.

"Кәсіпкерге төлемді картамен алса да, QR арқылы алса да бәрібір. Сондықтан, меніңше, мұндай жағдай бола қоймас", - деп атап өтті Ұлттық банк басшысы.

Тимур Сүлейменов жауапкершілік банктік карталарды қабылдаудан бас тартқаны үшін емес, жалпы қолма-қол ақшасыз төлемді қабылдаудан бас тартқаны үшін көзделген.

"Егер сіз дүкенге келгенде, сізге: "Менде тек қолма-қол ақша. QR-ды да, картаны да қабылдамаймын" десе, бұл үшін Әкімшілік кодексте баяғыдан бері санкциялар қарастырылған", - деп толықтырды ол.

19 шілдеде Қазақстанда бірыңғай банкаралық QR-төлем жүйесі толыққанды жұмыс істей бастайды. Сатып алушылар сатушыда қай банктің QR-коды тұрғанына қарамастан, кез келген банк қосымшасы арқылы тауар ақысын төлей алады. Банктерді жүйеге кезең-кезеңімен қосу 7 шілдеде басталды.

Бұған дейін Ұлттық банк төрағасының орынбасары Бинұр Жәленов бірыңғай QR іске қосылғаннан кейін кәсіпкерлер бір POS-терминал арқылы кез келген банк клиенттерінің төлемдерін қабылдай алатынын айтқан болатын. Бұл ретте бірнеше терминалдан бас тарту туралы шешімді әр бизнес банктің қызмет көрсету шарттары мен тарифтеріне қарай өз бетінше қабылдайды.

Google News арқылы жаңалықтарымызды қадағалаңыз