Менсінбейтіндер көп : 19 жастағы жігіт мүмкіндігі шектеулі жандарды жұмыспен қамтыды

АЛМАТЫ, 13 қараша – Sputnik. Астаналық 19 жастағы Нұржан Көжеков мүмкіндігі шектеулі жандарды жұмыспен қамтып отыр. Ол Sputnik Қазақстан тілшісіне берген сұхбатында анасының бастамасымен кәсіпкер болғанын айтты.

Нұржан Көжеков клинингтік қызмет көрсетеді. Бастапқыда жұмысты жиһаз жуатын роботпен бастаған. Кейіннен анасынан ақша алып, жиһаздарды химиялық жолмен тазалайтын құрылғы сатып алады. Жалпы кәсібімді анам қолдап отырады дейді жас жігіт.

"Астанада мыңнан астам клинингтік компания бар. Анам мүмкіндігі шектеулі адам болғандықтан, сондай жандарды жұмыспен қамтышы деп қолқа салды. Шын мәнінде ол кісілерге де пайда, маған да пайда. Қазіргі уақытта он шақты жұмысымыз бар, ең аз дегенде 250 мың еңбекақы алады. Егер тез әрі сапалы тазаласа, онда күніне 15-20 мың теңге табады", - дейді Нұржан Көжеков.

Үйін тазалауға тапсырыс беретіндердің 30%-і үй тазалаушының еңбегін дұрыс бағаламайды.

"Бір күні бір отбасыға бардық, ол үйде біздің жұмысшы сияқты мүмкіндігі шектеулі кісі бар екен. Біздің жұмысшыға орынсыз тиісіп, жұмыс істетпеді. Кейбір кісілер өте таза, сапалы етіп тазаласақ та, мүгедек деп менсінбей, еңбегімізді бағаламай қоятын кездері бар", - дейді Нұржан.

Бұл кәсіпке келіп еңбек еткісі келетіндер көп, бірақ оларды сапалы тазалауға үйрету оңайға соқпайды, дейді ол. Жалпы кәсіпті бастай салған уақытта опық жеген тұстары болған.

"Әу баста қызметімізді арзанға бағалап қойыппын, сөйтіп жалақы төлеуде қиындық туындады. Қазір басқа клинингтер сияқты бағаны жоғары қойдым. Қазіргі уақытта біздегі жаттықтырушы айына 700 мың теңге алады, кейде 1 млн теңгеге дейін табады. Біздегі жұмысшылар аптасына бес күн жұмыс істейді", - дейді жас кәсіпкер.

Нұржанның айтуынша, мүмкіндігі шектеулі адамдарға қоғамның көзқарасы төмен.

"Менің анам мүмкіндігі шектеулі жан, өмірінде көп қиындық көрген. Мұндай жандар алаяқтарға өте көп алданады, өйткені ақшадан көп қиналады. Менің ата-анамды алаяқтар 9 млн теңгеге алдап кеткен. Мүгедек жандар жұмыспен көп қамтылмайды, жұмысы болса да жалақысы 150 мың теңгенің айналасы. Менің арманым – осындай жандардың біразына жақсы жалақы, жақсы өмір сыйлау", - дейді Нұржан Көжеков.

Нұржанның екі мақсаты бар, бірі – 4 млн теңге қарызынан құтылу, екіншісі – теолог маманы болу.

Айтпақшы кәсіпкер жігіт жақында қосымша тағы да жұмысшылар алғалы жатыр.