“Мерседес“ пен қара “Магия“ небәрі 2,5 мың теңгеге сатылып жатыр

Алматы облысында көп жыл бойы шекарада қызмет етіп, енді "зейнетке шыққан" үш қызметтік ит саудаға шығарылды. Төрт аяқты достарға жаңа иелер іздестіріліп жатыр - оларды аукцион арқылы символикалық бағаға сатып алуға болады, деп хабарлайды Tengrinews.kz тілшісі.

Қандай иттер және қаншаға сатылады?

Иттер ҰҚК Шекара қызметі департаментінің иелігінде. Ал оларды электронды саудада Қорғаныс министрлігі жанындағы "Қазарнаулыэкспорт" кәсіпорны сатып жатыр.

Иттердің бірінің лақап аты - "Мамон".

Оны небәрі 935 теңгеге сатып алуға болады.

Саудаға шығарылған "Мамон" атты ардагер ит. Фото sauda.e-qazyna.kz сайтынан

Ал мынау - "Мерседес" атты шығыс еуропалық овчарка.

Саудаға шығарылған "Мерседес" атты ардагер ит. Фото sauda.e-qazyna.kz сайтынан

Ол қара түсті "Магиямен" бірге сатылып жатыр. Екеуі үшін 2 472 теңге сұралып отыр.

Саудаға шығарылған "Магия" атты ардагер ит. Фото sauda.e-qazyna.kz сайтынан

Барлық иттің жасы 10-да, олар Қалжат ауылында тұр. Сауда-саттық 27 тамыз күні сағат 10:00-де басталады.

18 тамызда өткен саудада жеті қызметтік ит сатылған болатын. Олардың арасында, мысалы, 10 жасар неміс овчаркасы Матео болды. Ол 935 теңге бастапқы бағамен ұсынылды.

Неміс овчаркасы Матео / Фото sauda.e-qazyna.kz сайтынан

Электронды сауда порталындағы мәліметке сүйенсек, ол сатылып кеткен.

"Қазарнаулыэкспорт" бұған дейін қызметтік иттердің мемлекеттік мүлік екенін түсіндірген болатын. Сондықтан ит зейнетке шыққаннан кейін кинолог өзінің төрт аяқты серігін үйіне тегін алып кете алмайды.

Сөз 9–10 жастағы иттер туралы болып отыр. Мұндай жаста олар бұрынғы жұмысын атқара алмайды. Кәсіпорын өкілдерінің сөзінше, егер төрт аяқтыларға жаңа ие табылмаса, оларды ұйықтатуға тура келер еді.

Саудадағы төмен баға иттердің ресми түрде өз ресурсын тауысқан деп есептелуімен түсіндіріледі. Аукцион алдында олардың құнын мамандар бағалайды.

Бұл ретте ұйым сауданың басты мақсаты - иттерден ақша табу емес, оларға жайлы мекен табу екенін баса айтты. Көбіне бұрынғы үй жануарларын олармен жылдар бойы бірге жұмыс істеген кинологтар мен ветеринарлар сатып алады.

Кәсіпорын шекарашылардың өздері де хабарласып, қызметтік иттерді үйлеріне алып кету үшін сауданың қашан болатынын сұрағанын айтты.

Жануарларды қызметкерлерге тегін беруге болмайды - бұл мемлекеттік мүлікке заңсыз билік ету болып саналады. Сондықтан аукцион жалғыз заңды жол болып қала береді.

Қызметтік ардагер-иттер жаңа иесін іздейді: олар 900 теңгеден сатылып жатыр

Google News арқылы жаңалықтарымызды қадағалаңыз