Meta компаниясы ЖИ шығындарын өтеу үшін 8 мың қызметкерін қысқартады

Facebook, Instagram және WhatsApp әлеуметтік желілерінің иесі америкалық Meta компаниясы шамамен 8 мың адамды немесе қызметкерлерінің 10%-ын жұмыстан босататынын жариялады, деп хабарлайды BBC. 

Бұл шешім фирманың жасанды интеллект технологияларына ірі инвестицияларымен байланысты.

Компания бейсенбі күні қызметкерлеріне жоспарланған қысқартулар туралы хабарлады. Сонымен қатар, бұрын ашылған бірнеше мың бос орынға жаңа қызметкерлерді қабылдаудан бас тартатынын мәлімдеді.

Негізгі себеп — жасанды интеллектке жұмсалатын орасан шығындар. Meta биыл осы салаға 135 млрд доллар бөлуге ниетті. Бұл соңғы үш жылдағы жалпы инвестиция көлеміне тең.

Meta-ның ресми өкілі қысқартуларды растағанымен, қосымша түсініктеме беруден бас тартты.

Компанияның негізін қалаушы әрі бас директоры Марк Цукерберг қаңтар айында биыл жаңа қысқарту толқыны болатынын меңзеген еді. Оның айтуынша, жасанды интеллект қызметкерлердің өнімділігін айтарлықтай арттырды — енді бір адам бұрын бірнеше адамның атқаратын жобасын жүзеге асыра алады.

«2026 жыл — жасанды интеллект біздің жұмыс істеу тәсілімізді түбегейлі өзгертетін жыл болады деп ойлаймын», — деді Цукерберг.

Бұл жылы Meta екі толқында шамамен 2 мың қызметкерді қысқартып үлгерді. BBC дерегінше, компания персоналы бірнеше аптадан бері әлдеқайда ауқымды қысқартуларды күтіп келген.

Соңғы айларда Meta жасанды интеллект модельдері мен құралдарына көбірек қаржы жұмсап, осы салада басқа технологиялық компанияларды қуып жетуге тырысуда.

Meta қызметкерлеріне компания олардың компьютердегі жұмысын бақылап, тіркейтінін хабарлады. Бұл деректер жасанды интеллект модельдерін оқытуға пайдаланылмақ. Кейбір қызметкерлер мұны «антиутопиялық тәжірибе» деп атады.

2022 жылдан бері Meta ондаған мың адамды жұмыстан босатқанымен, жаңа қызметкерлерді де қабылдады. Сондықтан жалпы персонал саны алғашқы қысқартуларға дейінгі деңгейде сақталған.

Қазіргі қысқарту 2023 жылдан бергі ең ірі толқын болмақ.

Технологиялық сектордағы қысқартулар 

Жасанды интеллектке инвестициялармен байланысты қысқартуларды басқа компаниялар да жариялады:

Amazon — 30 мыңнан астам адамды жұмыстан босатты; Oracle — 10 мыңнан астам қызметкерді қысқартты; Block — шамамен 4 мың адамды, яғни қызметкерлерінің жартысына жуығын жұмыстан шығарды; Snap — 1 мың қызметкерді қысқартты.

Сонымен қатар, Microsoft тәжірибелі қызметкерлерге ерікті түрде жұмыстан кетіп, өтемақы алуды ұсынды.

Көптеген компаниялар бұл шешімдерді жасанды интеллект мүмкіндіктерінің кеңеюімен және оған негізделген технологияларға инвестициялармен түсіндіреді.

Бүгін, 15:28