Министр баспана бағасына қатысты пікір білдірді

Өнеркәсіп және құрылыс министрі Ерсайын Нағаспаев баспана бағасының өсуіне қатысты жағдайды түсіндірді, – деп хабарлайды Aikyn.kz сайты.

Министрдің айтуынша, жеке құрылыс компанияларының баға саясатына тікелей ықпал ету мүмкін емес. Өйткені бұл — нарықтық қатынастарға негізделген процесс.

"Біз министрлік ретінде жеке құрылыс компанияларының бағасына ықпал ете алмаймыз. Бұл — нарық заңы. Егер сұраныс өссе, баға да өседі. Ал сұраныс төмендесе, сәйкесінше, баға да соған қарай өзгереді. Қазір нарықта дүрбелең байқалып отыр. Бағаға қатысты болжам айту — орынсыз. Кейбір құрылыс компаниялары өз пәтерлерін тезірек сатқысы келіп, нарықта жасанды ажиотаж туғызуы мүмкін. Бұл халықты 'баспананы тез алу керек' деген ойға жетелейді", — деді министр Үкімет үйінде өткен брифинг барысында.

Министр тұрғын үй нарығындағы бағаның қозғалысы көбінесе ажиотаждық сұранысқа байланысты екенін атап өтті.

"Бағаның күрт көтерілуіне нақты негіз көріп отырған жоқпын. Мұнда біз таза нарықтық механизмдер туралы айтып отырмыз. Ал әлеуметтік тұрғын үйге келсек — бұл бағытта біз бағаны бақылауда ұстап, оның өсуіне жол бермеуге тырысамыз", — деді Ерсайын Нағаспаев.