Министр неліктен барлық ауылдарға баратын жолдарға асфальт төселмейтінін түсіндірді

Көлік министрлігі барлық шағын ауылға асфальт жол салуды тиімсіз деп санайды. Бұл туралы Үкіметте өткен брифингте министр Нұрлан Сауранбаев айтты, деп хабарлайды Tengrinews.kz тілшісі.

Көлік министрлігі барлық шағын ауылға асфальт жол салуды тиімсіз деп санайды. Бұл туралы Үкіметте өткен брифингте министр Нұрлан Сауранбаев айтты, деп хабарлайды Tengrinews.kz тілшісі.

Журналистер шенеуніктен Мәжіліс депутаты Ирина Смирнованың қазақстандық ауылдарда асфальтсыз - цемент, топырақ, құм және қиыршық тас пайдаланып жол салу туралы ұсынысы жайлы сұрады. Жақында депутат мұндай жолдар 6–8 есе арзан болуы мүмкін екенін айтқан болатын.

Нұрлан Сауранбаевтың айтуынша, мәселе республикалық тасжолдар туралы емес, ауылдық жерлердегі - аудандар мен тірек ауылдардан шағын елді мекендерге дейінгі жолдар туралы болып отыр.

"Бізде ауылдық жерлерде, аудандардан елді мекендерге дейін 32 мың шақырымға жуық жол бар. Шағын ауылдарға асфальт жол салу экономикалық тұрғыдан тиімсіз деп санаймыз. Оған қаражат жетпейді", - деді министр.

Сауранбаев Көлік министрлігінің пайымдауынша, бір шағын елді мекенге бір асфальт жол салғаннан көрі, 10 ауылға сапалы қиыршық тасты жол салған дұрыс екенін түсіндірді.

"Егер ақша болса, біз, әрине, барлық ауылға асфальт жол саламыз. Бірақ бұл өте үлкен шығын. Мысалы, мұндай жолдың бір шақырымы орта есеппен 1 миллион доллар шамасында болуы мүмкін. Егер ауылға дейін 40 шақырым болса, бұл шамамен 40 миллион доллар. 15–20 адам тұратын ауылға мұндай жол салу қисынсыз", - деді ол.

Сондай-ақ министр ауылдық жерлерде ауыр техника мен комбайндар кесірінен асфальт жолдардың тез бұзылатынын атап өтті.

"Олар асфальт жолды бір жарым-екі жылда талқандап тастауы мүмкін. Соның салдарынан біз қомақты қаражат жұмсаймыз, бірақ бұл қаржыны тиімсіз пайдалану болып шығады", - деді Сауранбаев.

Шенеунік мысал ретінде Германияны келтірді, онда фермерлік қожалықтарға сапалы қиыршық тасты жолдар апарады-мыс. Министрдің айтуынша, бастысы жол кез келген ауа райында үйге жету мүмкіндігін қамтамасыз етуі керек.

ҚАЗІР ТАЛҚЫЛАНЫП ЖАТЫР

Салтанат Нүкенованың ағасы Бишімбаевтың қарындасымен “хайп“ жасады деген айыптауларға қатысты соттасты

12 мамыр 13:53 1

"Өзімізден де мысалдар бар. Маңғыстауда қазір көбісі Ақтөбе арқылы айналып өтпей, газ құбырына қызмет көрсететін қиыршық тасты жолмен жүреді. Бұл жақсы жол: ол даладан биік орналасқан, батпақты жер емес, адам кез келген ауа райында үйіне жете алады. Яғни, мұндай жол мобильділікті қамтамасыз етеді", - деп толықтырды ол.

Сауранбаев республикалық маңызы бар жолдар, облыс орталығынан ауданға дейінгі және ауданнан тірек ауылдарға дейінгі жолдар асфальтталған болуы тиіс екенін атап өтті.

"Ал ауданнан немесе тірек ауылдардан шағын ауылдарға дейінгі жолдарға келсек, өңірлер ол жерлерге бірден асфальт төсемеуі керек деп есептейміз. Алдымен барлық ауылды 100 пайыз қалыпты жолмен қамтамасыз етіп, содан кейін ғана қай жерге асфальт қажет екенін қарау керек", - деп түйіндеді министр.

Қазақстанда шағын елді мекендерге баратын жолдарда асфальттан бас тартып, оның орнына сапалы қиыршық тасты жолдар салу мәселесі бұған дейін де талқыланған болатын. Сол кезде Нұрлан Сауранбаев асфальт жол қиыршық тасты жолға қарағанда 6–10 есе қымбатқа түсетінін айтқан еді, сондықтан жаңа тәсіл көбірек ауылды қамтуға мүмкіндік беруі тиіс.

Кейін Мәжіліс депутаты Ирина Смирнова ауылдарда асфальтсыз — цемент, топырақ, құм және қиыршық тас пайдаланып жол салуды ұсынды. Ол мәселе шағын ауылдар мен фермерлік қожалықтарға баратын жолдар туралы екенін айтты.

Көлік министрлігі де бұған дейін мәселе барлық ауыл жолдары туралы емес, тек асфальт төсеу экономикалық тұрғыдан тиімсіз болуы мүмкін жекелеген шағын ауылдарға баратын жолдар туралы екенін түсіндірген болатын.