Мұнда кім жыртқыш? Қазақстанда қабанның қасқырларды қуған сәті видеоға түсіп қалды

Ақмола облысында қабанның ерекше әрекеті видеоға түсіп қалды. "Бұйратау" ұлттық паркінде жануар қасқырларды соңынан қуған, ал жыртқыштар қашуға мәжбүр болған, деп хабарлайды Tengri Life.

Қабан қасқырларды қуалап кетті

Бұл сәтті ұлттық парк аумағындағы фототұзақ түсіріп алған. Кадрлардан қабанның қасқырларды ізіне түсіп, қуып бара жатқанын көруге болады. Ол жыртқыштардан қашудың орнына, олардың соңынан тұра ұмтылған, ал қасқырлар болса, дереу бой тасалауға тырысқан.

Бұған дейін Қазақстанда жабайы жануарлардың тағы бір ерекше кездесуі қызу талқыланған болатын. Әлеуметтік желілерде "Іле-Балқаш" резерватынан түсірілген видео тарады, онда қабан кенеттен жолбарысқа қарай тап беріп, жыртқышты кейін шегініп, жасырынуға мәжбүрлейді. Желі қолданушылары бұл кадрларда жақында ғана табиғатқа жіберілген Үміт есімді жолбарыс болуы мүмкін деп болжады.

Бұл оқиға әлеуметтік желілерде кеңінен талқыланды. Желі қолданушылары жануарлардың күтпеген әрекетін сөз етіп, жағдайды әзілге айналдырды. Көпшілікті қабанның ірі жыртқыштан еш қаймықпағаны таңғалдырды.

Бізді Google-дың негізгі дереккөздер тізіміне қосыңыз