Ыстамбұлдағы көпқабатты үйдің құлау сәті видеоға түсіп қалды

Ыстамбұлда жеті қабатты тұрғын үйдің бір бөлігі опырылып түсті. Үйінді астында адамдар қалып қойған, құтқарушылар іздестіру-құтқару жұмыстарын жүргізіп жатыр, деп хабарлайды Tengrinews.kz тілшісі Haberler.com.

Үш қабаты опырылған

Төтенше жағдай 8 қазан күні таңертең Малтепе ауданында болған. Жергілікті уақыт бойынша сағат 05:40 шамасында жеті қабатты үйдің үш қабаты құлаған. Оқиғаның себебі әзірге белгісіз.

Оқиға орнына өрт сөндіру қызметі, AFAD, полиция, медицина қызметкерлері және басқа да жедел қызмет өкілдері жетті. Ғимарат ішінде қамалып қалған жоғарғы қабат тұрғындарын құтқарушылар эвакуациялады.

İstanbul Maltepe'de 7 katlı binanın 3 katında çökme meydana geldi. Ekipler 5 kişiyi kurtarırken, içerde kalan 7 kişinin kurtarılması için çalışmalar sürüyor https://t.co/3eTSbyuTw1

— Gazete 360 (@360Gazete) October 8, 2026

Жергілікті биліктің мәліметінше, үйінді астында 12 адам қалуы мүмкін. Құтқарушылар үйінді арасынан бірнеше зардап шегушіні алып шықты. 8 қазан таңғы жағдай бойынша іздестіру операциясы жалғасып жатыр.

Билік ғимараттың қалған бөлігі де опырылып түсуі мүмкін екенін ескертті. Үйдің айналасы қоршауға алынып, қауіпсіздік шаралары күшейтілді.

Ыстамбұл провинциясының губернаторы Давут Гюль үйдің 1987 жылы салынғанын мәлімдеді. Оның дерегінше, ғимаратта 12 пәтер болып, онда 33 адам тіркелген. Бірінші қабатта тоқыма цехы жұмыс істеген. Губернатордың айтуынша, құтқарушылар үйінді астынан бес адамды шығара алған. Тағы жеті адам қирандылар астында қалып отыр, олардың төртеуімен байланыс орнатылды.

Үйдің опырылуына байланысты Ыстамбұл прокуратурасы тергеу амалдарын бастады.

Бізді Google-дың негізгі дереккөздер тізіміне қосыңыз