Мұндай мажорлардың заманы өтті : Бақытжан Базарбек Алматыдағы жол апаты туралы айтты

Парламент Мәжілісінің депутаты Бақытжан Базарбек Алматыдағы Әл-Фараби даңғылы бойында болған жол апатына қатысты пікір білдіріп, құқық қорғау жүйесін түбегейлі реформалау қажет екенін айтты, деп хабарлайды Arasha.kz.

Депутаттың айтуынша, жоғары лауазымды тұлғалар мен ірі бизнес өкілдерінің балаларына жасалатын «ерекше жағдай» мемлекеттік органдардың жұмысына кері әсерін тигізіп отыр. Ол бұл мәселені Парламент кулуарында журналистерге берген сұхбатында ашық көтерді.

Бақытжан Базарбек Алматыдағы жол қозғалысы ережелерінің сақталуына қатысты өз бақылауларымен де бөлісті. Оның сөзінше, қала көшелерінде қымбат спорттық көліктердің еркін жүруі және олардың иелерінің жауапкершіліктен жалтаруы қалыпты құбылысқа айналған.

Халық қалаулысы бұл мәселені тек Алматы деңгейінде емес, бүкіл ел бойынша қарастыру қажеттігін атап өтті. Ол ішкі істер органдарында ауқымды тексеріс жүргізіп, жүйені ретке келтіру керек деп санайды.

Сондай-ақ депутат "мажорлық" құбылысты қатаң сынға алды. Оның пікірінше, шенеуніктер мен ықпалды адамдардың балаларына көрсетілетін қамқорлық құқықтық теңдік қағидатына қайшы келеді.

"Мұндай "мажориктік" жағдай, яғни жоғары лауазымды шенеуніктердің, лауазымды тұлғалардың, ірі бизнесмендердің балаларына ішкі істер департаменттеріндегі лауазымды адамдардың қамқорлық танытуы – бұл тек Алматыда ғана емес, басқа аймақтарда да жеткілікті. Сондықтан ішкі істер органдарында ауқымды тазарту жүргізу қажеттілігі туындап тұр", – деді ол.

Сөз соңында Базарбек қоғамдағы ескі көзқарастардың уақыты өткенін айтып, заң алдында барлық азаматтың тең болуы тиіс екенін ерекше атап өтті.

"Мен өзім Алматыда Әл-Фараби көшесінің бойында тұрамын, күн сайын элиталық көліктердің зулап жүргенін көреміз, бірақ олардың жауапқа тартылғанын байқамаймыз. 90-жылдардағыдай "мажорлардың" заманы өтті", – деген пікір білдірді.