“Мұны қалай жеуге болады?“ Астана мектебінде балаларға не беретінін ата аналар көрсетті

Әлеуметтік желілерде Астанадағы Қасым Қайсенов атындағы №27 мектеп-лицейі оқушыларының ата-аналары тегін тамақ аясында балаларға ұсынылатын астың түрін талқылап жатыр, деп хабарлайды Tengri Education.

Неден басталды?

Мұндай жазбалардың бірі қызу талқыға түсті: автордың айтуынша, қызы тегін түскі асты ішкісі келмей, асханаға ақша аударуын сұраған.

"Мен: "Мектеп сені тегін тамақтандырып жатыр, не берсе, соны же" деп ашуландым. Бірақ балалардың алдына құсыққа ұқсайтын тамақ тартады деп үш ұйықтасам түсіме кірмепті!" - деді жазды ата-ана.

Оның сөзінше, тамақтың суретін көргеннен кейін қызының өтінішіне көзқарасы өзгерген.

"Бұл былжыраған нәрсені жемек түгілі, қараудың өзі мүмкін болмаса, маған мұндай тамақтану ваучерінің не керегі бар!" - деді ол.

Бұл ретте автор, баласының айтуы бойынша, ақылы тамақтың сапасы мүлдем басқаша екенін атап өтті.

"Ақшаға дәмді тамақтануға болады екен", - деді Астана тұрғыны.

Скриншот: Threads

Ата-аналар не дейді?

Жазбаның астындағы пікірлерде басқа да ата-аналар, соның ішінде балалары №27 лицейде оқитындар үн қатты.

Олардың бірі баласының осындай түскі астан кейін ақылы тамаққа көшкенін айтты. Оқушының анасының сөзінше, тегін мәзірде балаларға арпа жармасы мен басқа да үйреншікті тағамдар берілген.

"Біз арпа жармасына, макаронға қарсы емеспіз, бірақ дұрыстап пісіруге болады ғой, ал мұнда жарманы езіп берген", - деп жазған ол, былтырғы оқу жылында балалар мектепте жақсы тамақтанғанын атап өтті.

Скриншот: Threads

Пікірлерде ата-аналар мектеп тамағына қатысты басқа да шағымдарын білдірді. Бір ана осыдан екі жыл бұрын балаларға берілетін алманың сапасына назар аударғанын айтты.

"Ол алмаларға қарап жылағың келеді", - деп жазды ол.

Әйелдің айтуынша, сол кезде ата-аналар тобында оған баласына осындай алма берілгеніне де шүкір ету керектігін айтып жауап берген.

Білім басқармасы не дейді?

Осы жағдайға қатысты пікір алу үшін Астананың Білім басқармасына хабарластық.

Ведомство өкілдері №27 мектеп-лицейінің оқушыларына тауық еті фаршынан жасалған тағам ұсынылғанын хабарлады. Басқарма мәліметінше, ол бекітілген технологиялық карта талаптарына сәйкес дайындалған.

"Арнайы құрылған бракераж комиссиясы жүргізген тексеру нәтижесі бойынша тағамның сапасы мен қауіпсіздігіне қойылатын талаптардың бұзылуы анықталған жоқ", - делінген жауапта.

Десе де, Білім басқармасы ата-аналардың тамақтың сыртқы түріне қатысты ескертулерін назарға алды. Асхана қызметкерлеріне дайын тағамдардың сыртқы түріне, оның берілу мәдениетіне және оқушылар үшін тартымдылығына қосымша көңіл бөлу тапсырылды.

Мектеп тағамына қатысты сұрақ туындаса, ата-аналар не істеуі керек?

Егер ата-аналарды тамақтың түрі ғана емес, сапасы немесе қауіпсіздігі қанағаттандырмаса, мәселені әлеуметтік желідегі талқылаумен шектемей, шешу жолдарын іздеу керек. Бірінші кезекте мектеп әкімшілігіне хабарласып, нақты не нәрсе көңілден шықпағанын егжей-тегжейлі сипаттап беру қажет.

Жағдайды тіркеп қою маңызды: бала тамақты қашан және қандай түрде алды, нақты қандай кемшілік болды, бұл жағдай жиі қайталана ма, сондай-ақ суреті болса, оны сақтап қою керек. Бұл тамақ туралы субъективті пікір емес, нақты факті негізінде сөйлесуге мүмкіндік береді.

Егер мәселе санитарлық талаптардың немесе тамақтану қауіпсіздігінің ықтимал бұзылуы туралы болса, ата-аналар e-Otinish арқылы құзыретті органдарға ресми шағым жібере алады. Мұндай шағымда да жағдайды барынша егжей-тегжейлі баяндап, қолда бар материалдарды тіркеген жөн.

Сонымен қатар ата-аналар мектептегі бракераж комиссиясының жұмысы туралы ақпаратты талап етіп, дайын тағамдар сапасы мектепте қалай бақыланатынын сұрауға құқылы.

Сондай-ақ ата-аналар мектеп мәзіріне нақты не кіретіні, тағамдардың қалай дайындалатыны және олардың сапасы қалай бақыланатыны туралы сұрақтар қоя алады. Егер мәселе қайталана берсе, әр жағдайды тіркеп, ата-аналар чатындағы бір реттік хабарламамен шектелмей, тиісті орындарға шағымдану керек.

Айта кетейік, жаңа оқу жылынан бастап Қазақстанда мектептегі тамақтану талаптары өзгерді. Мәзірді балалардың жасы мен қажеттіліктерін ескере отырып жасау жоспарланған.

Негізгі өзгеріс - рационда қосылатын тұз бен қант мөлшері шектеледі. Бұл ретте тамақ дайындау үшін тек йодталған тұз қолданылуы тиіс. Мәзірдің кемінде 75 пайызы өсімдік тектес өнімдерден - көкөністер, жемістер, жармалар, бұршақ дақылдары, жидектер, жаңғақтар мен тұқымдардан тұруы керек.

Бұл ретте ыстық тамақ сақталады. Кейбір мектептерде тамақтану "швед үстелі" принципі бойынша ұйымдастырылуы мүмкін, ал шағын жинақ мектептерде және асханасы жоқ жерлерде балаларға ланч-бокстар беріледі.

Бұрынғыдай 1-4 сыныптың барлық оқушысы мен әлеуметтік осал топтағы балалар тегін ыстық тамақпен қамтамасыз етіледі.

Бізді Google-дың негізгі дереккөздер тізіміне қосыңыз

Қосу