MV Hondius лайнеріндегі хантавирус: ДДСҰ кең ауқымды таралу қаупі әзірге жоқ деп мәлімдеді

Дүниежүзілік денсаулық сақтау ұйымы круиздік лайнер MV Hondius бортынан барлық жолаушылар эвакуацияланғаннан кейін хантавирус инфекциясының кең ауқымды таралу қаупі әзірге жоқ екенін мәлімдеді, деп хабарлайды BBC. 

Алайда ұйым басшысы Тедрос Адханом Гебрейесус ұзақ инкубациялық кезеңге байланысты алдағы апталарда жаңа жағдайлар тіркелуі мүмкін екенін ескертті.

Қазіргі таңда тоғыз адамның ауруы расталды, тағы екі адамда күдік бар. Үш жолаушы қайтыс болды: Нидерланд азаматы, оның жұбайы және Германия азаматшасы. Францияда бір әйел ауыр жағдайда реанимацияда жатыр, Испанияда жеңіл симптомдары бар науқас оқшауланған. Нидерландыда 12 медицина қызметкері сақтық шарасы ретінде карантинге жіберілді.

Испания денсаулық сақтау министрлігі лайнерден эвакуацияланған 14 азаматтың бірінде вирус анықталғанын хабарлады. Италияда да күдікті жағдай тексерілуде. Франция президенті Эммануэль Макрон елдегі ахуал бақылауда екенін айтты, ал денсаулық сақтау министрлігі төрт азаматтың тесті теріс шыққанын, тағы 22 адамның екі апта оқшауланатынын мәлімдеді. Екі британдық науқас Нидерланды мен Оңтүстік Африкада ем қабылдап жатыр.

MV Hondius 17 мамырда Роттердамға жетуі тиіс. Круиздік компания кемені санитарлық тазалаудан өткізуді жоспарлап отыр. Лайнерде бастапқыда 23 елден 147 жолаушы мен экипаж мүшесі болған, сапар 1 сәуірде Аргентинадағы Ушуая қаласынан басталған.

Бүгін, 19:12