Мысыр кіру ережелерін өзгертті туристер нені білуі керек

Мысыр келген кезде берілетін визаны цифрлық форматта рәсімдеудің жаңа жүйесін кезең-кезеңімен іске қоса бастады. 2026 жылғы 1 тамыздан бастап визаны келген бойда алуға құқығы бар шетелдік саяхатшылар визалық алымды алдын ала онлайн төлеп, QR-код ала алады. Бұл код Каир халықаралық әуежайында төлқұжат бақылауынан өту кезінде көрсетіледі, деп хабарлайды Tengri Travel VisaNews-ке сілтеме жасап.

Алғашқы кезеңде жаңа жүйе Каир әуежайында ғана жұмыс істейді және әзірге кәдімгі қағаз визалармен қатар қолданылады.

Жаңа жүйе қалай жұмыс істейді?

QR-кодты ресми Visa on Arrival порталы арқылы, сондай-ақ App Store, Google Play және AppGallery-дегі мобильді қосымша көмегімен алуға болады. Бұдан бөлек, ұшып келгеннен кейін Каир халықаралық әуежайының келу залында орнатылған өзіне-өзі қызмет көрсету дүңгіршектері арқылы да қызметті пайдалануға мүмкіндік бар.

Рәсімдеу кезінде азаматтықты және ұшып келетін әуежайды таңдау қажет. Әзірге жүйеде тек Каир әуежайы (CAI коды) бар. Содан кейін саяхатшы QR-код келетін жарамды электронды пошта мекенжайын көрсетеді. Оны смартфонға сақтап қоюға да болады - құжатты басып шығару қажет емес.

Мысырдың Туризм және көне ескерткіштер министрі Шериф Фатхи жаңа жүйені енгізу елге келуді барынша ыңғайлы етуі тиіс екенін атап өтті. Оның айтуынша, пилоттық кезең билікке елдің басқа әуежайлары мен кіру пункттеріне біртіндеп кеңейтпес бұрын "жаңа жүйенің тиімділігін бағалауға және жұмысын іс жүзінде тексеруге" мүмкіндік береді.

Цифрлық виза қанша тұрады?

Келген кезде рәсімделетін цифрлық визаның құны бір саяхатшыға 36 доллар (шамамен 17 мың теңге) болады.

Бұл сомаға:

30 доллар - визалық алым; 6 доллар - QR-кодты рәсімдеу үшін қызметтік алым кіреді.

Қызмет ақысын тек банктік карталармен төлеуге болады. Бұл ретте бір транзакциямен бірнеше QR-кодты рәсімдеуге болады, бірақ әр саяхатшыға жеке код беріледі.

Айта кетсек, 2026 жылдың наурызынан бастап Мысырға барған кезде берілетін виза құны 30 доллар (шамамен 14 мың теңге) болып белгіленген. Жаңа цифрлық қызметті пайдаланған жағдайда, осы сомаға 6 доллар мөлшеріндегі қызметтік алым қосылады.

QR-код неше күн жарамды?

QR-код берілген сәттен бастап жеті күн жарамды және оны бір саяхатшы бір рет қана қолдана алады.

Сондықтан саяхатшыларға оны рейстің ауысуы немесе кешігуі мүмкін екенін ескеріп, қосымша уақыт болу үшін, сапардан шамамен бір апта бұрын рәсімдеу ұсынылады.

Төлем аяқталғаннан кейін өтінімдегі деректерді өзгерту мүмкін емес.

"Келген кездегі цифрлық виза" деп аталғанына қарамастан, жаңа жүйе алдын ала рәсімделетін және кіруге рұқсат беру туралы алдын ала шешімді көздейтін электронды виза (e-Visa) емес.

Қызмет визалық алымды алдын ала төлеп, QR-код алуға мүмкіндік береді. Елге жіберу туралы түпкілікті шешімді құжаттар мен QR-кодты тексергеннен кейін шекара қызметінің қызметкері қабылдайды.

Бұдан бөлек, саяхатшылар келген кезде виза алуға құқығы бар-жоғына өздері көз жеткізуі тиіс. QR-код алу елге кіруге автоматты түрде рұқсат берілгенін білдірмейді.

Барлық төлем түпкілікті және толтыру кезінде қате кетсе, сапардан бас тартылса немесе Мысырға кіруге рұқсат берілмесе де қайтарылмайды.

Қағаз визалар әзірге қалады

Пилоттық іске қосу кезеңінде QR-кодқа көшу міндетті емес. Мысырдың Туризм және көне ескерткіштер министрлігі цифрлық жүйе қағаз визалық стикерлерді рәсімдеудің үйреншікті схемасымен уақытша қатар жұмыс істейтінін хабарлады.

Бұл жаңа платформаны толық көлемде енгізбес бұрын сынақтан өткізуге мүмкіндік береді. Қағаз визалардан толық бас тарту күні әлі жарияланған жоқ.

Әзірге қызмет тек Каирге баратындар үшін қолжетімді. Мысырдың басқа әуежайларына, соның ішінде Хургада, Шарм-эш-Шейх, Марса-Алам, Луксор және Александрияға ұшып баратын жолаушылар үшін цифрлық жүйе әлі жұмыс істемейді.

Айта кетейік, Қазақстан мен Мысыр арасында визалық режим әлі бар, сондықтан Қазақстан азаматтары үшін сапар алдында қолданыстағы ережелерге сәйкес кіру рұқсатын рәсімдеу қажет.

Мысыр қазақстандық туристер арасындағы ең танымал шетелдік бағыттардың бірі, әсіресе күзгі-қысқы маусымда Қызыл теңіз жағалауындағы курорттық қалаларға тікелей әуе рейстерінің арқасында сұраныс жоғары.

Бұған дейін Мысыр қазақстандықтарға баруға кеңес берілмейтін елдер тізімінен шығарылған болатын.

Тағы оқыңыз: Шетелдіктердің Қазақстанға келу ережелері өзгертілмек

Google News арқылы жаңалықтарымызды қадағалаңыз

Жазылу