Мысыр Қазақстаннан келетін туристер үшін елге кіру талаптарын жеңілдетеді

Мысыр қазақстандық туристер үшін елге кіру тәртібін жеңілдетеді. Елді демалысқа келетін азаматтарына қосымша талаптар қойылатын Орталық Азия мемлекеттерінің тізімінен шығару туралы шешім қабылданды. Бұл туралы Қазақстан мен Мысырдың сыртқы істер министрлері кездесу барысында уағдаласты, деп хабарлайды Tengri Travel.

Қазақстанның Сыртқы істер министрлігінің мәліметінше, бұл шешім қазақстандықтардың сапарын жеңілдетіп, екі ел арасындағы туризмді дамытуға септігін тигізуі тиіс. Сонымен қатар визалық режим әзірге сақталады, сондықтан сапар алдында кіру ережелерін тексеріп алу маңызды.

Қазақстандықтар үшін не өзгереді?

Келіссөздер Қазақстан сыртқы істер министрі Мұхтар Тілеубердінің Мысырға ресми сапары барысында өтті. Ол Мысыр СІМ басшысы Бадр Абдельаттимен кездесті.

Министрлер тек туризмді емес, сонымен қатар сауда, инвестиция, мәдени байланыстар мен елдер арасындағы ынтымақтастықты талқылады.

Басты нәтижелердің бірі – қазақстандық туристер үшін елге кіру тәртібін жеңілдету туралы келісім болды.

"Сондай-ақ 2006 жылғы 7 қарашадағы дипломатиялық паспорт иелерін визадан босату туралы үкіметаралық келісімге өзгерістер енгізу туралы хаттамаға қол қойылды. Құжат жарамды қызметтік паспорты бар Қазақстан мен Мысыр азаматтарына визасыз режимді қолдануды қарастырады", - деп хабарлады СІМ.

Дегенмен, жаңа шарттардың қашаннан бастап күшіне енетіні әзірге нақтыланбады. Сондықтан сапарға шығар алдында Мысыр елшілігінен өзекті ережелерді анықтап алған жөн.

Қазақстан азаматтары үшін қолданыстағы кіру ережелері

Оң өзгерістерге қарамастан, Қазақстан мен Мысыр арасындағы визалық режим сақталады. СІМ ақпаратынша, 2025 жылдың 1 қазанынан бастап қазақстандықтар үшін Мысырға кірудің айрықша ережелері қолданылады.

21 жасқа толмаған балалар мен жастарға елге әкесінің немесе анасының еріп жүруінсіз кіруге болмайды. Шарм-эль-Шейхке 15 күннен аспайтын мерзімге баратын 21 жастан асқан туристерге визаны тікелей әуежайда алуға рұқсат етілген. Каирге, Хургадаға немесе басқа қалаларға баратындар Мысырдың Қазақстандағы елшілігінен визаны алдын ала рәсімдеуі қажет.

Маңызды: Кіруді жеңілдету туралы келісім визаны мүлдем рәсімдеудің қажеті жоқ дегенді білдірмейді. Әзірге қолданыстағы ережелерді басшылыққа алған жөн.

Мысырда келген бойда берілетін цифрлық виза пайда болды

2026 жылдың 1 тамызынан бастап Мысыр виза рәсімдеудің жаңа жүйесін іске қоса бастады. Енді кейбір шетелдік туристер виза ақысын алдын ала онлайн төлеп, әуежайда көрсету қажет QR-кодты ала алады.

Әзірге бұл жүйе тек Каир әуежайында ғана жұмыс істеп тұр. Басқа әуежайларда, соның ішінде Хургада мен Шарм-эль-Шейхте ол әлі қолжетімді емес.

Мысырдың Туризм және көне ескерткіштер министрі Шериф Фатхи биліктің алдымен жаңа жүйенің қаншалықты тиімді жұмыс істейтінін тексеріп алғысы келетінін түсіндірді. Егер бәрі сәтті болса, ол біртіндеп басқа әуежайларда да қолданыла бастайды.

Цифрлық визаны қалай рәсімдеуге болады және оның құны қанша?

Қызметті ресми Visa on Arrival порталында, мобильді қосымшалар арқылы (App Store, Google Play және AppGallery-де) немесе Каирдің ұшып келу залындағы арнайы өзіне-өзі қызмет көрсету киоскісінде рәсімдеуге болады.

Рәсімдеу кезінде бірнеше қадамнан өту керек:

Азаматтықты және ұшып келетін әуежайды таңдау (қазір тек Каир қолжетімді). Жарамды электрондық пошта мекенжайын көрсету. Төлемді банк картасымен жасау.

Төлем жасалғаннан кейін поштаға QR-код келеді. Оны смартфонға сақтап қоюға болады - қағазға басып шығарудың қажеті жоқ.

Келген бойда берілетін цифрлық визаның құны бір адамға 36 долларды құрайды. Бұл сомаға мыналар кіреді:

30 доллар - визаның өзі; 6 доллар - QR-кодты рәсімдеу.

Қызмет ақысын банк картасымен төлеуге болады. Егер бірнеше адам саяхаттаса, төлемді бір транзакциямен жасауға рұқсат етіледі, бірақ әрбір туриске жеке код беріледі.

Бірнеше маңызды жайт бар. QR-код жеті күн бойы жарамды және тек бір адамның бір рет кіруіне арналған. Төлем жасалғаннан кейін өтінімдегі мәліметтерді өзгерту мүмкін емес, ал қаражат тіпті сапардан бас тартқан жағдайда да қайтарылмайды.

Сонымен қатар код елге кіруге кепілдік бермейді: түпкілікті шешімді құжаттарды тексергеннен кейін шекара қызметкері қабылдайды.

Қағаз визалар әзірге жойылмайды

Әзірге туристер жаңа цифрлық қызмет пен үйреншікті қағаз визаның бірін таңдай алады. QR-кодтарға көшу міндетті емес.

Мысырдың жаңа жүйеге қашан толық көшетіні әзірге белгісіз.

Қазақстандықтар келген кезде берілетін цифрлық визаның тек Каирде ғана қолжетімді екенін де есте сақтауы тиіс. Егер ұшақ басқа қалаға қонса, сапарға қажетті құжаттарды ресімдеу тәртібін алдын ала тексеріп алу қажет.

Бізді Google-дың негізгі дереккөздер тізіміне қосыңыз

Қосу