Астанада Есіл өзені күрт тартылып қалды: әкімдік себебін атады

23 қазан күні таңертең Астана тұрғындары ерекше құбылысты байқады: Кенесары көшесі жағындағы Есіл өзені бір түннің ішінде тартылып қалған. Қала тұрғындары әлеуметтік желілерде өзеннің бұрынғы және қазіргі суреттерін жариялап жатыр, деп хабарлайды Tengrinews.kz тілшісі.

Суреттерге қарағанда, Есіл өзеніндегі су деңгейі айтарлықтай төмендеп, өзен түбінің үлкен аумақтары ашылып қалған. Тек кей жерлерде ғана шағын су қоймалары қалған.

Ал кеше ғана өзеннің жағдайы қалыпты болатын, дейді қала тұрғындары.

"Кеше ғана арна толы су болатын, балықшылар балық аулап жүрген еді, бірақ кешке қарай Есіл өзені тез тартыла бастады, ал таңертең су мүлдем болмай шықты", - деп жазды бізге оқырмандар.

Threads-тен скриншот

Астана тұрғындарының бірінің айтуынша, су барлық жерден бірдей кетпеген.

Threads-тен скриншот

Астана әкімдігінің баспасөз қызметі жоспарлы жұмыстар кезінде өзен арнасы басқа жаққа бұрылғанын түсіндірді.

"Қалалық құрылыс басқармасы Есіл өзеніндегі су реттейтін бөгеттің бесінші кезеңін салу бойынша жоспарлы жұмыстар жүргізді. Қазіргі уақытта жұмыстар аяқталды, су деңгейін көтеру басталды", - деп хабарлады әкімдік.

Өзендегі су деңгейінің нақты қай уақытқа дейін қалпына келетінін әкімдік нақтыламады.

Тағы оқыңыз: Кішкентай Сарыбұлаққа қатысты үлкен жоспар: Астана орталығындағы өзеннің қазіргі жай-күйі қандай?

Бізді Google-дың негізгі дереккөздер тізіміне қосыңыз