НАТО елдері Украинаға ұзақ мерзімді көмек көрсету мәселесі бойынша келісімге келе алмады

АСТАНА, 1 шілде – Sputnik. НАТО елдері Түркияда өтетін альянс саммитіне дайындық барысында 2027 жылға арналған Киевке әскери көмек көрсету жөніндегі ұзақ мерзімді міндеттемелерді келісе алмады, деп жазды Frankfurter Allgemeine Zeitung газеті.

НАТО саммиті 7-8 шілде күндері Анкарада өтеді. Саммитке дайындық аясында сейсенбі күні Брюссельде альянсқа мүше елдер өкілдерінің кездесуі өтті. Жиында алдағы саммиттің қорытынды декларациясының жобасы, соның ішінде Украинаға қатысты мәселелер талқыланды.

"Киевке көрсетілетін көмектің тұрақтылығына қатысты міндеттеменің екінші бөлігіне қарсылық әлі де сақталып отыр. Декларация жобасында одақтастардың 2027 жылы кемінде қазіргі деңгеймен шамалас көлемде көмек көрсетуді жалғастыру жөніндегі міндеттемелерін растайтыны көрсетілуге тиіс еді", – деп жазады басылым дипломатиялық ортадағы дереккөздерге сілтеме жасап.

НАТО елдері 2026 жылы Украинаға әскери қолдау көрсету үшін 70 миллиард еуро бөлуге келіскен. Алайда тараптар арасындағы келіспеушіліктерге байланысты 2027 жылға арналған осындай міндеттемелер бойынша ортақ мәмілеге келе алмады.

Газеттің жазуынша, мұндай міндеттемені құжатқа енгізуге Италия қарсы болған.

Ал АҚШ саммиттің қорытынды декларациясы жобасына Украина мен Еуропа қауіпсіздігінің "ажырамас байланысы" туралы тұжырымдарды енгізуге тосқауыл қойған. FAZ ақпаратына сәйкес, соның нәтижесінде құжат жобасында тек: "Украина трансатлантикалық қауіпсіздікке үлес қосады" деген қысқа ғана тұжырым қалған.

НАТО елдері өкілдерінің декларация жобасын талқылауға арналған келесі келіссөздер кезеңі бейсенбі күнге жоспарланған.