Нетаньяху Иранға жаңа соққы жасауды жоспарлап отыр

Израиль премьер-министрі Биньямин Нетаньяху АҚШ президенті Дональд Трамппен Иран аумағына жаңа соққылар жасау мүмкіндігін талқылауды жоспарлап отыр, деп хабарлайды Arasha.kz.

Бұл туралы дереккөздерге сілтеме жасап, NBC News телеарнасы хабарлады.

Олардың мәліметінше, Израиль үкіметінің басшысы Тегеранның зымыран бағдарламасына байланысты алаңдаушылығын америкалық көшбасшыға жеткізбек және оның дамуы «жедел [қарсы] әрекеттерді талап етуі мүмкін» екенін айтпақ. NBC News дерегіне сәйкес, Нетаньяху Трампқа жаңа әскери операцияларға АҚШ-тың ықтимал қатысу нұсқаларын немесе Вашингтон тарапынан оларды жүзеге асыруға көмек көрсету жолдарын ұсынады. Телеарнаның хабарлауынша, Нетаньяху мен АҚШ президентінің кездесуі 29 желтоқсанда Флорида штатында өтуі мүмкін.

Бұған дейін Трамп егер Иран басшылығы Вашингтонмен келісімге келмей, зымыран бағдарламасын жүзеге асыруды жалғастырса, АҚШ қайтадан соққы беруі мүмкін екенін жоққа шығармаған. Трамптың айтуынша, Иран өзінің ядролық бағдарламасын дамытуды да «сынап көруі мүмкін». АҚШ оны жоюға дайын болады деп мәлімдеген америкалық көшбасшы.