Николас Мадуро АҚШ түрмесінен алғаш рет мәлімдеме жасады

Нью-Йорктегі федералдық тергеу изоляторында қамауда отырған Венесуэла президенті Николас Мадуро мен оның әйелі Силия Флорес алғаш рет венесуэлалықтарға үндеу жасап, көрсеткен қолдаулары үшін алғыс айтты, деп хабарлайды Arasha.kz.

Олардың мәлімдемесі сенбі күні Мадуроның X (бұрынғы Twitter) желісіндегі парақшасында жарияланды.

«Бізге сіздердің хаттарыңыз бен дұғаларыңыз жетті. Әрбір жылы сөз, әрбір қамқорлық пен қолдау біздің жанымызға қуат беріп, рухани тұрғыда нығайта түсуде», - делінген жолдауда.

Ерлі-зайыптылар отандастарын елдегі бейбітшілікті сақтауға, ұлттық бірлікті нығайтуға, татуласуға, кешірімді болуға және бірігуге шақырды. «Ешкім диалог, қатар өмір сүру және құрмет жолынан таймасын, өйткені бұл - Отан жолы, бұл - игілік жолы», - деп жазды олар.