№90 мектеп лицей ұжымы Global teacher Татьяна Белоусовамен кездесті

Алматыдағы «№90 мектеп-лицейі» ұстаздары мен оқушылары әлемнің үздік мұғалімдерінің қатарына енген, GLOBAL TEACHER халықаралық мәртебесіне ие болған Татьяна Белоусовамен кездесті.

Іс-шара аясында Татьяна Белоусова өз тәжірибесімен бөлісіп, заманауи педагогиканың негізгі тәсілдері туралы айтып береді, сондай-ақ GLOBAL TEACHER беделді халықаралық мәртебесіне ие болу ерекшеліктерін түсіндірді. Қатысушылар өздерін толғандырған сұрақтарын қойып, білім беру саласындағы өзекті мәселелерді талқылап, оқыту сапасын арттыруға арналған практикалық ұсыныстар алды.

Іс-шараның қорытындысы ретінде мектептің қазақ театрының «Менің атым Қожа» қойылымының премьерасының салтанатты ашылуы өтті. Қызыл лентаны құрметті қонақ Татьяна Белоусова қиды.

№90 мектеп-лицейінің директоры Бұлбұл Расбекқызының айтуынша бұл іс-шара педагогтардың кәсіби қауымдастығын дамытуға, оқушылардың шығармашылық бастамаларын қолдауға және мектептің инновациялық әрі мәдени білім беру орталығы ретіндегі имиджін нығайтуға бағытталған.

«Бұл кездесу біз үшін өте маңызды. Өйткені Татьяна Геннадьевна зейнеткер бола тұра, осындай үлкен конкурсты жеңіп алып жатыр. Жас мамандарды, студенттерді мектепке тарту, педагог  мәртебесін көтеруге өте пайдалы деп ойлап, жанымызда жүрген қаһармандарды мектепке шақыру болды мақсатымыз. Олардың жетістікке қалай жеткенін айту әріптестерімізге пайдалы, мүмкін оқушыларымыздың арасында болашақта мамандықтарын мұғалімдікпен жалғастыратын балалар бар шығар. Бізге жақсы мұғалімдер керек. Біздің алдымызда отырған балалар өте талантты. Бұл арнайы физика-математикалық лицей. Қазір әсіресе математика, физика химия пәнінің мұғалімдері аз. Сондықтан бұл бір жағынан балаларымызға кәсіптік бағдар ретінде жасалып отырған іс-шара. Әрі бүгін мектебімізде қазақ театрының тұсаукесері. Сол театрымызды осындай керемет адамдар ашып берсін деген ниетпен де шақырып отырмыз», дейді Бұлбұл Расбекқызы.

Айта кетейік, Алматыдағы №95 мектеп-лицейдің химия пәні мұғалімі, «Қазақстанның үздік ұстазы – 2024» құрметті атағының иегері Татьяна Белоусова Global Teacher Prize 2025-2026 халықаралық байқауының қорытындысы бойынша әлемнің ең үздік 50 педагогінің қатарына енді. Әлемнің ең үздік 50 мұғалімінің ресми тізімі 2025 жылы 15 желтоқсанда Global Teacher Prize ресми сайтында жарияланды.
Кейін ұстазды Мемлекет басшысы құттықтап,  жоғары марапат өскелең ұрпақты тәрбиелеу мен оқытуға бағытталған көпжылдық жасампаз еңбегінің нәтижесі екенін атап өткен еді.  

«№90 мектеп-лицей Алматы қаласындағы әйгілі оқу орындарының бірі. Мектеп ұжымымен, оқушылармен кездесіп, тәжірибе бөлісу мені әрқашан шабыттандырады. Қазақстан Global Teacher Prize бес рет қатысып, үш рет үздік 50 пагагогтың қатарына кірді. Алдағы уақытта үздік 10-дыққа кірсе деп тілейміз. Бұған ұстаздар қауымының толық мүмкіндігі бар. Ұстаздарымыздың осындай кездесулерден бағыт алып, қатысып, жеңімпаздар қатарына қосылуына тілектеспін. №90 мектеп-лицей басшылығына, ұжымына алғыс айтамын», дейді Татьяна Белоусова.

Іс-шараның соңында мектепте «Шырақ» қазақ театры ашылып, балалардың сүйікті шығармасы  «Менің атым Қожа» сахналанды. Қызыл лентаны құрметті қонақ Татьяна Белоусова ханым қиып, жас өнерпаздарға сәттілік тіледі.

Айта кетейік, №90 мамандандырылған дарынды балаларға арналған физика-математика бағытындағы лицей Алматы қаласындағы ең танымал оқу орындарының бірі. Ең үздік ұстаздардың бірі Бұлбұл Оспанбек басқаратын мектепте бүгінде 1256 бала білім алады.