Нұрлан Жақыпов Лукойлдың санкцияға ілігуіне қатысты пікір білдірді

– Таяуда «Лукойлдың» санкциялық тізімге іліккені туралы жаңалық шықты. Өте күрделі мәселе. Қазіргі уақытта тиісті консультанттармен, оның ішінде халықаралық та консультанттармен «ҚазМұнайГаздың» аталған жағдайдан қалай шығатынына қатысты ауқымды жұмыс жүргізіліп жатыр, - деді ол Ақордада БАҚ өкілдерінің сауалына орай.

Оның атап өтуінше, «Лукойл» Қазақстанда 30 жылдан астам уақыттан бері жұмыс істейді. Елімізде ресейлік компанияның үлкен жобалары бар. Ол «Теңіз», «Қарашығанақ», «Қаламқас-Хазар» сынды кен орындарының акционері саналады. 

– Бұл өте күрделі мәселе. Бір жағынан Қазақстан үшін, «ҚазМұнайГаз» үшін «Лукойл» сенімді серіктес саналады. Екінші жағынан біз – заңнамаға, салынған санкциялық шараларға сай жұмыс істейтін адал корпоративті азаматпыз. Сол себепті таяуда санкциялық шектеулерді ескере отырып, бұл бағыттағы жұмысты одан ары қарай жалғастыруға қатысты нақты шешімдер әзірлейміз, - деді Нұрлан Жақыпов. 

Бұған дейін Энергетика вице-министрі Санжар Жәркешов Үкімет отырысынан кейін өтіп жатқан баспасөз мәслихатында санкцияға түскен «Лукойлдың» Қазақстандағы жобалары туралы пікір білдірді. 

Айта кетейік, 22 қазанда АҚШ санкциясына түскен «Лукойл» компаниясы өзге елдердегі үлесін жаппай сататыны хабарланды.