Объективте ауыл тірлігі

«Ауыл» партиясы республикалық «Ауыл нақыштары» фотобайқауының қорытындысын жариялады. Еліміздің дәстүрлерін сақтау мен насихаттау мақсатында өткен байқау ауыл өмірінің оң имиджін қалыптастыруға үлес қосқан мәдени жоба болды. Осы орайда талай талапты бақ сынасқан дүбірлі додада «Egemen Qazaqstan» газетінің фототілшісі Ерлан Омар жүлделі болғанын айта кетейік.

Марапаттау рәсімінде үздік жұмыстар көр­месінің ашылуы өтіп, Мәдениет және ақпарат министрлігінің қол­дауымен шығарған «Ауыл нақыштары» атты көркем фотоальбомы таныстырылды.

«Ауыл нақыштары» байқауы тек қана еліміздің дәстүрін сақтау мен наси­хат­тауға арналған маңызды іс-шара ғана емес, сонымен қатар фотосурет өнерін ілгерілетуге арналған қуатты құрал. Жыл сайын байқауға қатысушылар саны артып, бізге ауылдық өмірдің сұлу­лығы мен ерекшелігін көрсетуге мүмкіндік береді», дейді «Ауыл» партиясының төрағасы Серік Егізбаев.

«Ауыл пейзаждары», «Еңбек адамының фотопор­треті», «Фоторепортаж», «Ауылдағы бақытты бала­лық» атты аталымдарында өткен биылғы байқауға еліміздің түкпір-түкпірінен 678 қатысушы қатысқан. Жалпы, 3366 фотосурет ұсынылған. Сондай-ақ «Көрер­мендер көзайымы» аталымында әлеуметтік желі қолданушылары ұна­ған фотосуретті таңдай алды. Telegram чатында ұсы­ныл­ған 10 үміткерден дауыс беру ар­қылы жеңімпаз анық­тал­ды.

Байқау жеңімпаздары сертификаттар мен бағалы сыйлықтармен мара­пат­та­лып, жалпы жүл­де қоры 3 900 000 тең­гені құра­ды.

Сонымен, фотобәйгенің қорытынды шешімімен, бас жүлде – Максат Шағырбаев (Шымкент), «Ауыл пейзаждары» аталымында 1-орын – Досжан Балабекұлы (Алматы) 2-орын – Мейірбек Тажкуранов (Батыс Қазақ­­стан облысы) 3-орын – Ерлан  Омаров (Астана), «Еңбек адамының фотопортреті» аталымында 1-орын – Ержан Нұрпеисов (Атырау облысы), 2-орын – Тлеубек Шаяхмет (Шығыс Қазақстан облысы), 3-орын – Қайсар Шерімов (Шымкент), «Фоторепортаж» аталымында 1-орын – Мейірбек Тажкуранов (Батыс Қазақстан облысы), 2-орын – Ерлан Омаров (Астана), 3-орын – Азамат Хусаинов (Алматы), «Ауылдағы бақытты балалық» аталымында Мират Қоржынбаев (Батыс Қазақстан облысы), «Көрермендер көзайымы» аталымында Маркс Қалқаманов (Атырау облысы) жүлделі болды.