Ол маған жол ашты : Михаил Шайдоров ағасы Денис Тен жайлы жүрекжарды сөзін айтты

2026 жылғы қысқы Олимпиада ойындарының чемпионы атанған қазақстандық мәнерлеп сырғанаушы Михаил Шайдоров жеңіске жету жолы оңай болмағанын айтты, деп хабарлайды Ozgeris.info.

Спортшы бұл маусым өзінің мансабындағы ең күрделі кезеңдердің бірі болғанын жасырмады. Оның айтуынша, Олимпиадаға дайындық барысында талай рет қиындықпен бетпе-бет келген.

— Маусым бойы өз-өзіммен күрестім. Жарыстарда бес бірдей төрттік секіруді бірнеше рет орындап көруге тырыстым, бірақ ұзақ уақыт бойы толық сәтті шықпады. Бүгін бәрі орнына келді. Бар күш-жігерімді салдым, соның нәтижесін көріп отырмын. Бұл алтын медальді Қазақстан халқына арнаймын, — деді ол.

Сонымен қатар Шайдоров марқұм Денис Теннің қазақстандық мәнерлеп сырғанау спортына қосқан зор үлесін ерекше атап өтті. Олимпиада чемпионының сөзінше, бүгінгі жетістікке жол ашқан тұлғалардың бірі — дәл сол Денис Тен.

— Қазақстанда мәнерлеп сырғанау спорты одан әрі дамыса екен деймін. Менің бұл медалім Денис Тен үшін де маңызды болар еді. Ол бізге үлкен жол ашты. Оның жолы да оңай болған жоқ, менікі де жеңіл болмады. Еліміздегі осы спорттың дамуына қосқан еңбегі үшін Дениске алғыс айтамын, — деді Шайдоров.