Олигархтар футбол клубтарын сатып алуды көздеп отыр тізім жарияланды

АСТАНА, 20 қазан – Sputnik. Қазақстанда бірнеше ірі компания футбол клубтарын жекешелендіруге ниет білдірді. Бұл туралы үкімет басшысының депутаттық сауалға берген жауабында жазылған, деп хабарлайды Sputnik Қазақстан.

Қазіргі кезде туризм және спорт министрлігі футбол федерациясымен бірге футбол клубтарын коммерцияландыру бойынша әлеуетті инвесторлармен келіссөз жүргізіп жатыр. Олар:

"Орталық Азия отын-энергетикалық компаниясы" АҚ (Сергей Кан) "Қызыл-Жар" футбол клубын сатып алуға ниетті;

Freedom Finance (Тимур Турлов) "Шахтер" футбол клубы үшін стадион мен футбол академиясын салуға қызығушылық танытуда;

Kaspi Group (Михаил Ломтадзе) "Жеңіс" футбол клубын сатып алуды және Астанада футбол инфрақұрылымын салуды көздеп отыр;

"TAU GROUP LTD" (Ислам Қозбақов) "Қайсар" футбол клубын сатып алуды жоспарлауда.

Сонымен қатар "Тараз", "Елімай" және "Ертіс" футбол клубтарына қызығушылық танытқан инвесторлармен кездесулер ұйымдастырылды.

Айта кетері, Қазақстанда 2026 жылдан бастап шетелдік спортшыларды мемлекеттік және квазимемлекеттік қаражат есебінен қаржыландыруға тыйым салынды. Ал әкімдіктер үшін кәсіпқой клубтарды жергілікті бюджет есебінен қаржыландыруға лимит қойылған. Атап айтқанда, футболға 500 АЕК-тен (2025 жылы – 1 966 000 теңгеден) артық төлеуге болмайды.