Олимпиада чемпиондары жетісулық жастармен жүздесті

24.KZ парақшасынан алынған деректерге сүйене отырып, Qazaq24.com мәлімдеме жасады..

Даңқты боксшы Ермахан Ыбырайымов, әйгілі желаяқ Ольга Шишигина және әлемдік додада атой салған балуан Юрий Мельниченко Талдықорғандағы спорт фестиваліне қатысты.

Талдықорғандық өрендер төрткүл дүниені мойындатқан кіл мықтыларды ерекше қошеметпен қарсы алды. Сайыпқыран саңлақтармен жүздескен жасөспірімдер үлкен арман-мақсатқа ұмтылудың маңызын ұғынды.

Айтөре Төкен, оқушы:

- Юрий Мельниченконы бұрын тек телеарнадан көргенмін. Қазір бетпе-бет кездесіп тұрмын. Мен де сол кісілер сияқты жаттығып, олимпиада чемпионы боламын.

Басқосуда аға буын өкілдері жеңіске жету жолындағы қиындықтарды қалай еңсергенін айтты. Мысалы Ермахан Ыбырайымовтың Сидней олимпиадасының финалындағы кездесуі асқақ рух пен намыстың сыналған сәті болыпты. Жалынды сөздерімен жігерлендірген даңқты спортшылар жастарды салауатты өмір салтын ұстануға үндеді.

Ермахан Ыбырайымов, Сидней олимпиадасының чемпионы:

- Әр спортшының өмірде кумирі болады. Сол кумирлеріне қарап алға қарай ұмтылады. Менің кумирім - Жақсылық Үшкемпіров, Серік Қонақбаев, Шәміл Серіков ағаларымыз. Мен 1980 жылы теледидардың алдында отырып, сол кісілерге ұқсасам деген арман оты, мені спортқа алып келді. Енді мені көргендер спорт залға барып, сол жігіттердің арасынан чемпиондар шығады деген сенімім мол.

Ұрпақ сабақтастығын жалғаған шара ұлттық құрама спортшыларын да шабыттандырып жеңіске деген сенімін арттырды.

Ильфат Абдуллин, Садақ атудан халықаралық дәрежедегі спорт шебері:

- Өзім олимпиаданың екі дүркін қатысушысымын. Олардың еңбектерін жақсы білемін. Қалай жеткендерін түсінемін. Аңыз адамдар. Біз үшін өте керемет жаңалық. Солардың мотивацияларын тыңдап, бізге де өте пайдалы болды деп ойлаймын.

Жастар кешеніндегі спорт фестивалі жасыл алаңда жалғасты. Евгений Яровенко, Құралбек Ордабаев, Асқар Қожабергенов сияқты ардагер футболшылар Талдықорған құрамасымен жолдастық кездесу өткізді.

Асқар Қожабергенов, ардагер футболшы:

- Жетісудың стадионына қайтадан келгеніме өте қуаныштымын. Жанкүйерлерді көргеніме қуаныштымын. Қазіргі методика, жас футболшылардың жағдайы біздің кезеңмен салыстырғанда өте жақсы.

Кейінгі үш жылда өңірде 30 спорт нысаны салынып, дене шынықтыру ғимараттарының жартысынан астамы жаңартылды. Жыл соңына дейін тағы үшеуі қолданысқа беріліп, жасөспірімдердің алаңсыз жаттығуына жағдай жасалады.

Авторлары: Шыңғыс Қалиден, Жеңіс Әбдірешов

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.