Оңай олжа таппақ болған браконьерлердің өздері жемтікке айналды ОАР да оларды лезде жаза күтіп тұрды

Оңтүстік Африка Республикасындағы Крюгер ұлттық паркіне келген екі браконьердің сапары қайғылы аяқталды. Ақ мүйізтұмсықтың мүйізін олжалау үшін күзетілетін аумаққа жасырын кірген ер адамдар суат басында пілдер үйіріне тап болған. Олардың бірі қаза тауып, екіншісі қашуға тырысқан, бірақ көп ұзамай ұсталды, деп хабарлайды Tengri Travel

Не болды?

The Sun ақпаратынша, оқиға Крюгер ұлттық паркінің аумағындағы Пафури аңшылық үйшігінің маңында болған.

Дабыл қағылғаннан кейін рейнджерлер іздеуге шығып, парктің ішіне қарай алты шақырымдай жол жүрген. Нәтижесінде олар мүйізтұмсықтар үйірінің маңынан браконьерлердің бірінің денесін тапты.

Басылымның мәліметінше, екі ер адам парктің ішіне ақ мүйізтұмсықты мүйізі үшін аулауға кірген. Суат басында жануарларға шабуыл жасамақ болған кезде, кенеттен африкалық пілдер пайда болған.

Ұлттық парк қызметкерінің айтуынша, браконьерлер қашып құтылмақ болған.

"Олар жан-жаққа қарай қашты, бірақ оқ атуға ыңғайланып жатқаны бөгеліп қалды. Пілдер оған бірінші болып тап беріп, қоршап алды да, аяусыз таптап тастады. Соңында тапқанымыз - киімдегі үлкен қанды дақ қана болды", - деді ол.

Poacher is trampled to death by elephants while 'lining up a shot' to kill a white rhino https://t.co/HVCCYxKcLd

- Daily Mail (@DailyMail) 2026 жылғы 15 қыркүйек

Екінші ер адам оқиға орнынан қашып үлгерген. Алайда ол алысқа ұзай алмаған.

Құқық қорғау органдарына болған жағдай туралы хабарланған соң, олар екінші күдіктіні іздеуге кірісті.

"Бізге оқиға туралы хабар түсті, біз күдіктінің ізіне түсіп, оқиға болған жерге дейін бардық", - деп толықтырды парк қызметкері.

Осылайша, заңсыз аңшылыққа шыққандардың бірі қаза тауып, екіншісі қамауға алынды.

Паркте оқиғаның мән-жайын анықтау жұмыстары жалғасып жатыр.

Оңтүстік Африка паркінде 1850-ге жуық ақ мүйізтұмсық, сондай-ақ әйгілі "үлкен бестік": піл, мүйізтұмсық, буйвол, арыстан және қабылан мекендейді.

Мүйізтұмсықтардың браконьерлер құрбанына айналуының басты себептерінің бірі - заңсыз нарықта олардың мүйіздерінің жоғары бағалануы. БАҚ мәліметінше, ақ мүйізтұмсықтың мүйізі шамамен 10 000 фунт стерлингке (шамамен 6 миллион теңге) бағаланады және қара базарда оның құны өз салмағындағы алтыннан да қымбат тұрады.

Мүйізтұмсықтың мүйізі негізінен кератиннен - адамның шашы мен тырнағының құрамына кіретін ақуыздан тұрады. Емдік қасиеттері дәлелденбегеніне қарамастан, кейбір елдерде мүйіз дәстүрлі медицинада қолданылып, түрлі ауруларға ем ретінде сатылады.

Бізді Google-дың негізгі дереккөздер тізіміне қосыңыз