Өңдеу өнеркәсібіндегі өндіріс көлемі 6,4% ға өсті

АСТАНА, 13 ақпан – Sputnik. 2025 жылдың қорытындысы бойынша өңдеу өнеркәсібіндегі өндіріс көлемінің өсімі 6,4%-ға жетті. Бұл туралы премьер-министрдің бірінші орынбасары Роман Скляр төрағалық еткен Өнеркәсіп және құрылыс министрлігінің алқа отырысында айтылды.

Оң динамика металлургия (1,2%-ға), машина жасау (12,9%-ға), химия өнеркәсібі (9,8%-ға), құрылыс материалдары өндірісі (9,7%-ға), резеңке және пластмасса бұйымдары өндірісі (7,6%-ға) және басқа да салалардағы өсім есебінен қамтамасыз етілді.

"Жалпы сомасы шамамен 1,5 трлн теңгені құрайтын 190 жоба пайдалануға беріліп, 22 мыңнан астам тұрақты жұмыс орны құрылды", - деп жазылған үкіметтің баспасөз қызметі таратқан хабарламада.

Қазақстандық тауар өндірушілердің тізілімі іске қосылып, жүйеде 800-ден астам компания тіркелді.

Үш жаңа арнайы экономикалық аймақ ("Ақтөбе", "Атырау" және "Қорқыт Ата" АЭА) құрылып, ірі жобалар бойынша 13 инвестициялық келісімге қол қойылды.

Құрылыстағы рекордтық көрсеткіштер

Құрылыс саласында да оң нәтижелерге қол жеткізілді. Жоспарланған 19,2 млн шаршы метрдің орнына 20,1 млн шаршы метр тұрғын үй пайдалануға берілді, бұл 185 мыңнан астам тұрғын үйді құрайды (НКИ – 105,1%). Бұл көрсеткіш алдыңғы кезең деңгейінен асып, жаңа рекорд орнатылды.

Сондай-ақ саланың тұрақты дамуына негіз болатын жаңа Құрылыс кодексі қабылданды.

Жер қойнауын пайдалану саласындағы реформалар

Мемлекеттік есепке Көк-Жон, Алтын-Шоқы, Самомбет, Студенттік және Тақыр-Қалжырды қоса алғанда 17 жаңа кен орны қабылданды.

Биыл жаңа буынның 1:50 000 масштабтағы егжей-тегжейлі карталарын жасау шеңберінде ел аумағының 100 мың шаршы шақырымы зерттеледі, кейіннен бұл көлем жыл сайын 30 мың шаршы шақырымға ұлғайтылады. Картаға түсіру жұмыстарын жүргізуге қойылатын жаңа талаптар бекітіліп, 20 жобалық-сметалық құжаттама әзірленді.