Оңтүстік Кореяда қазақ мейрамханасы ашылды

Қазақтың ұлттық тағамдары шетелдіктер арасында кең танылып келеді. Оңтүстік Кореяның Инчхон қаласында қазақ мейрамханасы ашылды. 

Қуырдақ пен бауырсақ дәмін тату үшін шетте жүрген қазақстандықтар да бұл жерге арнайы барады. 

Инчхон қаласында қазақ мейрамханасын Шығыс Қазақстан облысының тумасы Арайлым Алдажарова ашты. Бұл – іскер әйелдің көптен бергі арманы еді. Ол өзі тұрған шаһарда қазақтың мәдениеті мен тұрмыс-тіршілігі таныстыруды мақсат еткен. Арайлым Оңтүстік Кореяға 25 жыл бұрын жұбайымен бірге келген. Университетті осында тәмамдаған. Кейін жолдасымен бірге автокөлік экспортымен айналысатын компания құрды. Арайлымның екі ұлы бар: үлкені – 14 жаста, кішісі – небәрі екі айлық. Қазіргі таңда ол Корея Республикасының азаматтығын алған және оның үш есімі бар. Оңтүстік кореялықтар «Арайлым» есімін айтуға қиналып, оны Зарина деп атай бастаған. Кейін корейше Чон Ын Джу деп айтатын болған. 

Арайлым Алдажарова, қазақ мейрамханасының директоры:

- Біздің қазақтар бауырсақ, бешбармақ, соны аңсайды содан кейін. Сол қазақтың тағамын, біздің Орта Азия барлық ұлттарына арнап осы ресторанды ашып едім. Қазақстанды қатты сағынамын, аңсаймын, әке-шешемді сағынамын.

Инчхон – Оңтүстік Кореядағы халық саны бойынша үшінші ірі қала. Мұнда үш миллионнан астам адам тұрады. Мегаполисте шетелдік мейрамханалар көп болғанымен, қазақ мейрамханасы алғаш рет ашылып отыр. Келушілерге Қазақстаннан жеткізілетін еттің дәмі ерекше ұнайды.

Ким Ён, Инчхон қаласының тұрғыны:

- Өте дәмді. Дәмі де, интерьері де өте жақсы. Әсіресе стейк қатты ұнады. Еті жұмсақ, сіңірсіз.

Құрманбек Медеубеков, Қазақ мейрамханасының бас аспазшысы:

- Біздің етке жетпейді. Сарыарқаның жерінде жайылып жүрген етке қандай ет жетсін. Біз бәрін көрдік, қай ұн қандай болады, қай майдың дәмі қалай болады. Сол үшін біз көп заттарды Қазақстаннан алдыртып жасауға тырысып жатырмыз. Қазыны, етті, жаңағы майларымызды, жентімізді бәрін Қазақстаннан алдыртып, осындай Корей халқына дәмін көрсетіп, жегізіп, таныстырып жатырмыз.

Арайлым енді мейрамхананы қазақтың ұлттық стилінде безендіріп, қазақстандық тауарлар сататын дүкен ашуды жоспарлап отыр. Ал көктемде бұл жерде Инчхонда тұратын қазақтар Наурыз мерекесін атап өтпек.

Авторлары: Владислав Цой, Ольга Лян