Алатау сити жобасы Оңтүстік Кореяда таныстырылды

24.KZ парақшасынан алынған деректерге сүйене отырып, Qazaq24.com хабарлама жасады..

Оңтүстік Кореяның ірі компанияларына «Алатау сити» жобасы таныстырылды.

Сеулде Алматы облысында бой көтеретін жаңа қалаға арналған роуд-шоу өтті. Инвесторларды тарту мақсатында Оңтүстік Кореяға Қазақстан Үкіметінің делегациясы арнайы барды. Толығырақ Владислав Цой баяндайды.

«Алатау сити» таныстырылымына Оңтүстік Корея үкіметі мен ірі компаниялардың шамамен 400 өкілі қатысты. Қазақстанның ірі жобасының ауқымын көрсету үшін оны Кореяның ірі қалаларының бірімен салыстырды. Алатау 88 мың гектар аумақта орналасады, бұл Пусан қаласының аумағынан 1,4 есе үлкен. Инвестиция тартудың үлгісі ретінде Премьер-Министрдің орынбасары Қанат Бозымбаев Шэньчжэнь, Дубай және Рюссельсхайм қалаларын атады.

Қанат Бозымбаев, ҚР Премьер-министрінің орынбасары:

- Жоба шетелдік инвесторларға арналған ынталандырулар ұсынатын арнайы экономикалық аймақ болып жарияланды. Оларға корпоративтік табыс салығынан, жер және мүлік салығынан, жер төлемдерінен босату, сондай-ақ Алатау қаласында сатылатын тауарларға қосылған құн салығының нольдік мөлшерлемесі қарастырылған.

«Алатау сити» роуд-шоуының ең алдымен Оңтүстік Кореяда өтуі тегін емес. Екі елді 100 мыңнан астам корей диаспорасы байланыстырады. Ал жобаның бастамашысы Қазақстан корейлер қауымдастығының төрағасы Юрий Цхай.

Юрий Цхай, кәсіпкер:

- Бұл жоба 18 жылға созылған ұзақ әрі күрделі жолдан өтті. Бірақ қазір Президентіміз бұл жобаны толық қолдап отыр, тіпті оны ұлттық деңгейдегі жоба деп атады.

Форумның алғашқы күнінде Қазақстан Көлік министрлігі мен Корея әуежайлар корпорациясы, Қазақстан Энергетика министрлігі мен Жаһандық жасыл өсу институты, сондай-ақ Алматы облысының әкімдігі мен RETD компаниясы арасында ынтымақтастық туралы меморандумдарға қол қойылды. Сауда, өнеркәсіп және энергетика министрі Ким Чжон Гван Қанат Бозымбаевпен кездесуде Оңтүстік Кореяның экологиялық таза технологиялар, жасанды интеллект пен ақылды көлік жүйелерін пайдалануда үлкен тәжірибесі барын баяндай келіп, «Алатау» жобасы аясында серіктестік қажет екенін айтты.

Владислав Цой, Ольга Лян

Маңызды жаңалықтар мен жаңартуларды өткізіп алмау үшін Qazaq24.com сайтын қадағалаңыз.