Оңтүстік Кореядағы жұмыс: Еңбекмині қазақстандықтар үшін маңызды жаңалықтарды хабарлады

Қазақстан Оңтүстік Кореяның EPS (Employment Permit System) жұмысқа орналасуға рұқсат беру жүйесіне қатысушы елдердің тізіміне ресми түрде енгізілді. Аталған бағдарлама бойынша қазақстандық жұмысшыларды тарту 2028 жылдан басталады деп күтіледі, деп хабарлайды Tengrinews.kz Еңбек және халықты әлеуметтік қорғау министрлігіне сілтеме жасап.

Қазақстан EPS жүйесіндегі 18-ші ел болды

Корея тарапының шешімімен Қазақстан E-9 бағдарламасына қатысушы 18-ші ел атанды.

Қазіргі уақытта EPS жүйесіне 17 мемлекет қатысады. Олардың қатарында Филиппин, Моңғолия, Шри-Ланка, Вьетнам, Таиланд, Индонезия, Пәкістан, Камбоджа, Қытай, Бангладеш, Шығыс Тимор, Непал, Мьянма, Лаос, сондай-ақ Өзбекстан, Қырғызстан және Тәжікстан бар.

Анықтама: Employment Permit System (EPS) немесе Жұмысқа орналасуға рұқсат беру жүйесі — Оңтүстік Кореяның біліктілігі төмен шетелдік жұмысшылар үшін уақытша еңбек миграциясын реттеуге арналған ресми бағдарламасы. Оны 2004 жылы Жұмыспен қамту және еңбек министрлігі шағын және орта бизнестегі жұмыс күшінің тапшылығы мәселесін шешу үшін енгізген. Бағдарлама Оңтүстік Корея мен жұмысшы жіберуші елдер арасындағы екіжақты өзара түсіністік туралы меморандумдар негізінде жұмыс істейді. 2025 жылға қарай ол 20-ға жуық елді қамтиды. Мақсаты — рекрутингтегі сыбайлас жемқорлықты азайту және мигранттардың құқықтарын қорғау үшін шетелдік жұмысшыларды ұйымдасқан түрде іріктеу, оқыту және бақылау. 2011 жылы EPS жүйесі сыбайлас жемқорлыққа қарсы күрес және миграцияны басқаруды жетілдіргені үшін БҰҰ-ның мемлекеттік қызмет саласындағы алғашқы сыйлығына ие болды.

Қазақстан үшін бұл жүйеге қатысу — азаматтарды мемлекеттер белгілеген процедура бойынша Оңтүстік Кореяға ресми және ұйымдасқан түрде жұмысқа жіберу мүмкіндігін білдіреді.

Қазақстандықтар Кореяда қашаннан бастап жұмыс істей алады?

Жұмысшыларды нақты іріктеу 2028 жылдан басталады деп жоспарланған. Оған дейін Қазақстан мен Оңтүстік Корея бірқатар ұйымдастыру іс-шараларын аяқтауы тиіс.

Атап айтқанда, үкіметаралық өзара түсіністік туралы меморандумға қол қою және Қазақстанда кәпіс тілі бойынша тестілеу өткізілетін EPS-TOPIK орталығын құру жоспарланып отыр.

Жұмысшылар қалай іріктеледі?

Бағдарламаға қатысу кандидаттарды ресми іріктеуді қарастырады. Олар бірнеше кезеңнен өтуі тиіс, соның ішінде:

кәріс тілінен тестілеу; кәсіби дағдыларды бағалау; медициналық тексеру.

Іріктеу бейресми делдалдарсыз, ресми жүйе арқылы жүзеге асырылады.

"ҚР Еңбек және халықты әлеуметтік қорғау министрлігі азаматтарға ерекше ескертеді: процедура ресми түрде іске қосылғанға дейін "Кореяда кепілді жұмысқа орналастыруды" ұсынатын немесе іріктеуден жылдам өтуге уәде беретін делдалдарға ақша бермеу керек", - делінген хабарламада.

Тіркеу мерзімдері, кандидаттарға қойылатын талаптар, тестілеу тәртібі және басқа да шарттар министрліктің ресми ақпарат көздері арқылы жарияланады.

Еске салайық, Қазақстанды EPS жүйесіне қосу жұмыстары 2023 жылдан бері жүргізіліп келеді. 2024 жылғы қаңтарда Қазақстанға кореялық сарапшылар делегациясы келіп, елдің бағдарламаны іске қосуға дайындығын бағалады. Мамандар EPS орталығын құру, тілдік тестілеу, кәсіби дағдыларды бағалау, медициналық тексеру және азаматтарды корей заңнамасының талаптары туралы ақпараттандыру мәселелерін зерделеді.

Google News арқылы жаңалықтарымызды қадағалаңыз

Жазылу