Оқу ағарту министрі Жұлдыз Сүлейменова мектеп оқушылары мен мұғалімдерге қатысты өте маңызды мәлімдеме жасады

Оқу-ағарту министрі Жұлдыз Сүлейменова мектеп оқушылары мен ата-аналар үшін маңызды мәлімдеме жасады, – деп хабарлайды Aikyn.kz сайты.

Министрдің айтуынша, қазіргі білім беру жүйесіндегі ең өзекті мәселелердің бірі – оқушыларға түсетін оқу жүктемесінің шамадан тыс көптігі. Осыған байланысты балалардың уақытын едәуір алатын бөлім бойынша жиынтық бағалау (БЖБ) мен тоқсандық жиынтық бағалау (ТЖБ) сағаттарын қысқарту мәселесі ресми түрде қарастырылып жатыр.

Жұлдыз Сүлейменованың сөзінше, бұл шешім мектептердегі оқу бағдарламасының тым тығыздығына байланысты қабылданып отыр. Кейбір білім беру ұйымдарында оқушылар тіпті сенбі күндері де мектепке шақырылып, жиынтық бағалау тапсырмаларын орындауға мәжбүр.

– Мұндай жағдай балалардың демалу мүмкіндігін шектеп, олардың психологиялық әрі физикалық денсаулығына кері әсерін тигізеді, – деді министр.

Министрлік бұл мәселені жүйелі түрде шешу үшін нақты тетіктерді қарастырып жатқанын атап өтті.