Оқу ағарту министрі мұғалімдерге арналған жобаның тоқтайтынын мәлімдеді

Оқу-ағарту министрлігі «Мақсатты мектеп» жобасының тоқтатылатын жария етті, деп хабарлайды Egemen.kz. 

Оқу-ағарту министрі Жұлдыз Сүлейменованың қатысуымен білім беру саласының күн тәртібіндегі өзекті мәселелер бойынша жиналыс өтті. Жиында сөз алған министр білім беру ұйымдарындағы сапа мәселесіне тоқталып, «Мақсатты мектеп» жобасының жалғастырылмайтынын мәлімдеді.

Еске сала кетсек, «Мақсатты мектеп» жобасы педагогтердің кәсіби шеберлігін арттыруға, олардың заманауи педагогикалық әдістерді меңгеруіне және білім беру сапасын жақсартуға бағытталған. Жоба аясында мұғалімдер үшін арнайы тренинг, семинар және тәжірибе алмасу платформалары ұйымдастырылды.

Білім саласының қызмкеткерлері бұған қарсы шығып, мыңнан аса адам қол қойып, ашық хат жолдаған еді. Хатта: «Мақсатты мектеп» жобасының жұмысы материалдық-техникалық жарақтандырудан емес, мұғалімдерді онлайн оқытудан басталды. Мұғалімдер тамыз айынан бері бес модульдік онлайн оқудан өтті. Әр модуль сайын көптеген онлайн тест тапсырды. Тест сұрақтарының басым бөлігі психологиялық, методикалық сұрақтардан тұрады. Пәнге арналған сұрақтардың өзі де қатеге толы. Енді заңды сауал, мұғалімдер бала оқыта ма, әлде онлайн оқып, күн сайын тест тапсыра ма?», делінген.