Оқушыларды қорқытқан: Бішкек мектептерінде қауіпсіздік шаралары күшейтілді

Қырғыз Республикасының Ішкі істер министрлігі мектеп оқушыларын қорқытқан ер адамды анықтады. Министрлік мәліметінше, ол — 2005 жылы 23 қазанда туған шетел азаматы Ярослав Овсюк. Бұл азамат бұрын телефон арқлылы террорлық әрекетке қатысқаны үшін Ресей Ішкі істер министрлігінің халықаралық іздеуінде болған. Оның Қырғыз Республикасының аумағына өтуі тіркелмеген.

— Оқушылар мен мұғалімдердің қауіпсіздігін қамтамасыз ету үшін барлық мектептерге полицияның қосымша күштері жұмылдырылды. Кейбір білім беру мекемелері уақытша қашықтан оқытуға көшті. Барлық келіп түскен хабарламалар мен өтініштер жедел түрде тексеріліп жатыр. Министрлік азаматтарды сабырлы болуға, үрейленбеуге шақырады, — делінген хабарламада.

«Манас» халықаралық әуежайында да лаңкестік қауіп туралы хабардан кейін қауіпсіздік шаралары күшейтілді.

«Қырғызстан аэропорттары» ААҚ баспасөз қызметінің хабарлауынша, әуежайдың Авиациялық қауіпсіздік қызметі терминал ғимараты мен оның маңайында мұқият тексеріс жүргізіп жатыр.

— Жолаушылар мен қызметкерлердің қауіпсіздігін қамтамасыз ету үшін барлық қауіпсіздік шаралары күшейтілді. Тексеру жұмысы тоқтамай, барынша жылдам жүргізіліп жатыр. Қазіргі уақытта «Манас» әуежайы қалыпты режимде жұмыс істеуде. Қауіпсіздікті күшейту және қоғамдық тәртіпті сақтау үшін қосымша қызметтер жұмылдырылды, — деп хабарлады әуежайдан.

Бішкек қаласының әкімдігі Қырғыз Республикасының Ішкі істер министрлігінен алынған қосымша ақпарат негізінде мектеп оқушыларын онлайн оқытуға көшіру туралы шешімін өзгертті.

- Ішкі істер министрлігінің мәліметінше, оқушыларды қорқытқан видеоны таратқан адам Қырғызстанда емес. Тізімде көрсетілген мектептердің барлығы тексеріліп, күдікті заттар мен қауіп төнгені анықталған жоқ. Полиция қызметкерлері оқушылар мен мұғалімдердің қауіпсіздігін қамтамасыз етіп, күшейтілген режимде жұмысын жалғастырып жатыр, - делінген хабарламада.

Бұған дейін Бельгияда премьерге қарсы лаңкестік әрекет жоспарлаған үш күдікті ұсталғанын хабарлаған едік.