Жылыту маусымында қауіпсіздік шаралары күшейтілді

Жылу маусымы басталғалы 1,3 миллионнан астам тұрғын үйге профилактикалық рейдтер ұйымдастырылып, тұрғындарға өрт қауіпсіздігі жөнінде жан-жақты түсіндіру жұмыстары жүрді.

Бұл туралы Төтенше жағдайлар министрлігі Өртке қарсы қызмет комитеті төрағасының орынбасары Асқар Төлешов айтты. Биыл өрт саны өткен жылмен салыстырғанда 8 пайызға төмендеді. Қаза тапқандар 9%-ға, жарақат алғандар 7%-ға азайды. Төтенше жағдайлар министрлігі профилактикалық шараларды маусым бойы жалғастырады. 

Асқар Төлешов, ҚР ТЖМ Өртке қарсы қызмет комитеті төрағасының орынбасары:

- Профилактикалық рейдтердің нәтижесінде 110 мыңнан астам тұрғын үй өртке қарсы қауіпсіз жағдайға келтірілді. Әлеуметтік осал топтарға ерекше көңіл бөлеміз. Олардың үйлерін өртке қауіпсіз күйге келтіру бойынша жан-жақты көмек көрсетілуде. Әкімдіктер мен еріктілердің қатысуымен 2,5 мыңнан астам үйде пеш жөнделіп, қалыпқа келтірілді. Қазіргі таңда 40 мыңнан астам датчик орнатылды.